Yay aylarında həm orqanizmi sərinlədən, həm də sağlamlığa faydalı içkilər arasında akroşka xüsusi yer tutur.
E-saglam.az xəbər verir ki, yay aylarında həm sərinlədən, həm də sağlamlıq baxımından faydalı olan yeməklərə tələbat artır. Belə yeməklərdən biri də rus mətbəxindən tanınan, lakin bizim mətbəxə də uyğunlaşdırıla bilən kefirli akroşkadır. Bu, əsasən doğranmış tərəvəzlər və kefir əsasında hazırlanan soyuq şorbadır.
Nə üçün kefirli akroşka faydalıdır?
1. Bağırsaq sağlamlığı üçün dəstək:
Kefir təbii probiotiklərlə zəngindir. Bu maddələr bağırsaq florasını gücləndirir, həzmi yaxşılaşdırır və immun sistemini aktivləşdirir.
2. Aşağı kalorili və doyurucu:
Akroşka çox az kaloriyə malik olsa da, tərkibindəki qaynadılmış kartof, yumurta və tərəvəzlər sayəsində uzun müddət toxluq hissi verir. Bu xüsusiyyət onu həm pəhriz saxlayanlar, həm də sağlam qidalanmaq istəyənlər üçün ideal edir.
3. Orqanizmi sərinlədir və maye balansını qoruyur:
Yay istisində bədən tez-tez susuz qalır. Akroşka həm maye ehtiyacını ödəyir, həm də minerallarla orqanizmi təmin edir.
4. Hazırlanması asan və iqtisadidir:
Sadəcə kefir, qaynadılmış kartof, yumurta, təzə xiyar, göyərti və istəyə uyğun olaraq bir az turp və ya toyuq əti ilə hazırlanır. Soyuducuda saxlanıldıqda bir neçə saat sonra daha da dadlı olur.
Nə vaxt və necə içilməlidir?
Kefirli akroşka əsasən naharda və ya axşam yüngül yemək kimi qəbul edilə bilər. Soyuq halda içilməsi tövsiyə olunur. Əsas yemək kimi verildikdə çörəksiz və ya bir dilim çörəklə yemək mümkündür.
Könül Oruc
