Həftəsonu daha gec yatmaq və səhərlər gec oyanmaq bir çox insanın vərdişidir. Lakin yuxu rejiminin tez-tez dəyişməsi ürək-damar sağlamlığına mənfi təsir göstərə və infarkt, insult riskini artıra bilər.
E-saglam.az xəbər verir ki, neyroalim Vyet Nguyen bu barədə “Mirror” nəşrinə müsahibəsində danışıb. Onun rəhbərliyi ilə aparılan araşdırmada 10 min yetkin insanın məlumatları təhlil edilib. Nəticələr göstərib ki, yuxu və oyanma rejimi müntəzəm pozulan insanlarda infarkt, insult və ürək çatışmazlığı riski 20-23 faiz daha yüksək ola bilər.
Araşdırmaya əsasən, gecədən-gecəyə yuxu müddətinin cəmi 30 dəqiqə dəyişməsi belə ürək-damar xəstəlikləri riskinin artması ilə əlaqələndirilib. Bu dəyişikliklər xüsusilə həftəsonları özünü göstərə bilər.
Mütəxəssis bildirib ki, insanlar cümə günləri daha gec yatmağa, həftəsonları isə adi rejimlərindən fərqli saatlarda oyanmağa meyilli olurlar. Bu isə orqanizmin bioloji ritmini poza bilər. Neyroalimin sözlərinə görə, həftəsonu yuxu rejimindəki bu dəyişikliklər ürək sağlamlığına mənfi təsir göstərə bilər.
Mütəxəssis yuxu rejimini qorumaq üçün həftə ərzində eyni saatlarda yatıb-oyanmağı tövsiyə edir. Hər səhər eyni vaxtda oyanmaq və yatmaq saatlarını mümkün qədər sabit saxlamaq orqanizmin bioloji ritminin tənzimlənməsinə kömək edə bilər.
Qeyd edək ki, araşdırmada yuxu rejiminin qeyri-sabitliyi ilə ürək-damar problemləri arasında əlaqə müəyyən edilib. Bu, gec yatmağın birbaşa infarkt və ya insult yaratdığını sübut etmir. Lakin müntəzəm və keyfiyyətli yuxunun ürək sağlamlığı üçün əhəmiyyətini bir daha göstərir.
Könül Oruc
