Bir çox insan əllərinin və ayaqlarının daim soyuq olmasını fərdi xüsusiyyət hesab edir. Lakin bu hal bəzən orqanizmdə müəyyən problemlərin əlaməti ola bilər. Xüsusilə isti otaqda və ya yay aylarında belə əllər və ayaqlar üşüyürsə, bunun səbəbini araşdırmaq vacibdir.
E-saglam.az xəbər verir ki, tibb elmləri doktoru, professor və ümumi praktikant Svetlana Kanevskayanın sözlərinə görə, soyuq havada orqanizm istiliyi qorumaq üçün əsasən əl və ayaq barmaqlarındakı qan damarlarını daraldır. Bu, normal fizioloji reaksiyadır. Ancaq üşümə temperaturdan asılı olmayaraq davam edirsə və halsızlıq, yuxululuq və ya saç tökülməsi ilə müşayiət olunursa, diqqətdən kənarda qalmamalıdır.
Professor ətrafların daim soyuq olmasının bir neçə mümkün səbəbini göstərib.
Dəmir çatışmazlığı
Ən çox rast gəlinən səbəblərdən biri dəmir çatışmazlığıdır. Dəmir orqanizmdə oksigenin daşınmasında iştirak edən hemoglobinin yaranması üçün vacibdir. Dəmir ehtiyatları azaldıqda toxumaların oksigenlə təminatı zəifləyə bilər. Bu vəziyyət halsızlıq və soyuğa həssaslıqla müşayiət oluna bilər. Bəzən hemoglobin səviyyəsi hələ normal qalsa da, dəmir ehtiyatlarını göstərən ferritin artıq azalmış olur.
Qalxanabənzər vəzinin zəif fəaliyyəti
Digər mümkün səbəb hipotiroidizmdir. Bu zaman qalxanabənzər vəzi kifayət qədər hormon istehsal etmir və maddələr mübadiləsi ləngiyir. Nəticədə insan soyuğa daha həssas olur. Yorğunluq, yuxululuq, dəri quruluğu və çəki artımı da müşahidə edilə bilər.
Reyno fenomeni
Əllərin və ayaqların üşüməsinin başqa bir səbəbi Reyno fenomenidir. Bu vəziyyətdə soyuq və ya emosional gərginlik zamanı barmaqlardakı kiçik damarlar kəskin daralır. Nəticədə barmaqlar əvvəlcə ağara, sonra göyərə və daha sonra qızara bilər. Bəzən bu dəyişikliklər ağrı, keyimə və iynəbatma hissi ilə müşayiət olunur. Reyno fenomeni bəzi hallarda revmatik xəstəliklərlə də əlaqəli ola bilər.
Hansı hallarda həkimə müraciət etmək lazımdır?
Professor aşağıdakı əlamətlər olduqda həkim müayinəsindən keçməyi tövsiyə edir:
-
Barmaqların ağrı ilə birlikdə ağarması və ya göyərməsi, dəridə çatların və yaraların yaranması;
-
Bir əl və ya ayağın digərindən nəzərəçarpacaq dərəcədə soyuq olması;
-
Yeriyərkən baldır nahiyəsində ağrı yaranması və dayanmağa məcbur qalmaq;
-
Davamlı yorğunluq, dəri quruluğu və çəki dəyişiklikləri;
-
Ayaqlarda keyimə, həddindən artıq susuzluq və tez-tez sidiyə getmə.
Svetlana Kanevskaya səbəbi müəyyən etmədən damar dərmanları qəbul etməyi məsləhət görmür. Onun sözlərinə görə, ilkin qiymətləndirmə üçün ümumi qan analizi, ferritin və TSH göstəricilərinin yoxlanılması faydalı ola bilər. Barmaqlarda rəng dəyişikliyi, ağrı və yaralar müşahidə olunarsa, revmatoloqa müraciət etmək lazımdır.
Əllərin və ayaqların daim üşüməsi hər zaman ciddi xəstəlik demək deyil. Lakin bu hal davamlıdırsa və başqa əlamətlərlə müşayiət olunursa, səbəbi müəyyənləşdirmək üçün həkim müayinəsi vacibdir.
Könül Oruc
