Təbii saç boyası olaraq tez-tez seçilən və saçları qidalandırdığı bilinən xına yanlış istifadə edildikdə istənməyən problemlərə səbəb ola bilər. Xınanın səhv tətbiqi saç tellərinə və baş dərisinə zərər verə bilər.
E-saglam.az xəbər verir ki, tərkibində kimyəvi maddələr olmadığı üçün təbii boya olan xınaya üstünlük verilsə də, mütəxəssislər səhv istifadə edildikdə saç sağlamlığına mənfi təsir göstərə biləcəyi barədə xəbərdarlıq edirlər.
Bitki mənşəli boya olan xınanın eramızdan əvvəl 7-ci əsrə aid tarixi var. İlk dəfə bədən sənəti üçün istifadə edilən bu təbii maddə zamanla saçların rənglənməsi və yumşaldılması üçün də məşhurlaşıb. Ancaq xına hər saç növü üçün uyğun deyil.
Qırılma və quruluq riski
Xınanın düzgün tətbiq edilməməsi saç tellərini və baş dərisini qurudaraq qırılmalara səbəb ola bilər. Mütəxəssislər deyirlər ki, baş dərisi həssas olan insanlar uzun müddət saçlarında xına qoymamalıdırlar, əks halda saç tökülməsi və qırılması qaçılmaz olacaq.
Nəmlik itkisi
Xınanın ən böyük zərərlərindən biri də saçları qurutmasıdır. Mütəxəssislər bu problemin qarşısını almaq üçün xına qarışığına aloe vera, qızılgül suyu və ya təbii nəmləndiricilərin əlavə edilməsi lazım olduğunu vurğulayırlar. Əks halda saçların sərtləşə və kövrək ola biləcəyi bildirilir.
Kimyəvi maddələrlə birləşdikdə zərər verə bilər
Xına qalıcı boya olduğu üçün onu saçdan çıxarmaq çox çətindir. Bu səbəbdən xınadan sonra kimyəvi boyalardan və ya ağardıcılardan (saçın rəngini açmaq üçün vasitələr) istifadə saç tellərini zəiflədə və saç tökülməsinə səbəb ola bilər. Xüsusilə qeyd olunur ki, tərkibində metal duzları və əlavələri olan boyalardan qaçınmaq lazımdır.
Diqqətlə istifadə etmək lazımdır
Xına təbii bir seçim olsa da, mütəxəssislər şüurlu və diqqətli istifadə edilməli olduğunu, səhv tətbiqlərin uzun müddət saç problemlərinə səbəb ola biləcəyini deyirlər. Xınanın faydalarını maksimum dərəcədə artırmaq və zərərlərini minimuma endirmək üçün düzgün üsullarla tətbiq etmək tövsiyə olunur.
Tərcümə: Könül Oruc
