İlin sonu yaxınlaşdıqca iş yükü, maliyyə narahatlıqları və sosial tələblər insanlarda emosional yorğunluğu artırır.
E-saglam.az xəbər verir ki, klinik psixoloq Selin Küçük bildirir ki, hədəflərin bağlanması, intensiv iş tempi və artan sosial gözləntilər stress üçün münbit zəmin yaradır. Bu dövrdə yuxu pozğunluğu, diqqət çətinlikləri, motivasiya azalması və əhval-ruhiyyənin dəyişkənliyi tez-tez müşahidə olunur.
Ən çox rast gəlinən simptomlar arasında emosional tükənmə, əsəbilik, səbirsizlik, qərar qəbul etməkdə çətinlik və həddindən artıq yüklənmə hissi var. Küçük vurğulayır ki, əgər bu əlamətlər iki həftədən çox davam edirsə, peşəkar qiymətləndirmə zəruridir. Əks halda tükənmə sindromu iş, sosial həyat və gündəlik fəaliyyətlərə davamlı təsir göstərə bilər.
İlin sonu stressini azaltmaq üçün bir neçə praktik addım tövsiyə olunur: real vaxt planlaşdırması, qısa zehni fasilələr, sosial öhdəliklərin sadələşdirilməsi, yuxu rejiminin qorunması və lazım gəldikdə peşəkar dəstək axtarmaq.
Beləliklə, sürətli temp və emosional yükə baxmayaraq, balanslı iş-güc rejimi və özünə vaxt ayırmaq il sonunu daha sağlam şəkildə keçirməyə imkan verir.
Tərcümə: Könül Oruc
