Dünyada ilk dəfə hepatit B virusunun diaqnostikası üçün sürətli test qeydiyyata alınıb. Bu test həssaslığına görə PCR metodu ilə müqayisə edilə bilər.
E-saglam.az xəbər verir ki, bu barədə məlumatı Rusiyanın İstehlakçıların Hüquqlarının Müdafiəsi və İnsan Rifahına Nəzarət üzrə Federal Xidməti (Rospotrebnadzor) yayıb.
Qurumun epidemiologiya sahəsindəki alimləri dünyada ilk dəfə izotermal amplifikasiyaya əsaslanan (LAMP – Loop Mediated Isothermal Amplification) hepatit B virusunun diaqnostikası üçün sürətli test hazırlayıblar.
Məlumatda qeyd olunur ki, yeni testin həssaslığı PCR metodu ilə eynidir, lakin virusun olub-olmadığını cəmi 25–30 dəqiqə ərzində müəyyən etməyə imkan verir. Bu isə ənənəvi metodlarla müqayisədə diaqnostika prosesini əhəmiyyətli dərəcədə sürətləndirir.
Test hepatit B-ni tez və dəqiq şəkildə aşkarlamağa imkan verir ki, bu da xəstələrin vaxtında müəyyənləşdirilməsi, müalicənin başlanması və epidemiya əleyhinə tədbirlərin həyata keçirilməsi baxımından mühüm əhəmiyyət daşıyır.
Tərcümə: Nəzrin Abbas
