Elm adamları görmə məhdudiyyətli insanların görmə qabiliyyətini qismən bərpa edən implant hazırlayıblar.
E-saglam.az xəbər verir ki, Amerikalı alimlər görmə məhdudiyyətli insanların yenidən görmə qabiliyyəti qazanmasına kömək edə biləcək yeni texnologiya icad ediblər. Bu implant insanlara oxumaq və gündəlik fəaliyyətləri yerinə yetirmək üçün lazım olan qismən görmə funksiyasını bərpa etməyə imkan verir.
“Financial Times”ın məlumatına görə, implant coğrafi atrofiya səbəbindən görmə itkisi yaşayan şəxslərdə mərkəzi görməni bərpa etməyə qadirdir. Bonn Universitet Xəstəxanasının Oftalmologiya şöbəsinin müdiri Frank Holz bildirib:
“Bu, yaşa bağlı makula dejenerasiyasının müalicəsində yeni bir mərhələdir”.
Yeni sistem xəstənin taxdığı xüsusi eynəyə yerləşdirilmiş kameradan ibarətdir. Kamera çəkdiyi görüntüləri 2x2 millimetr ölçülü simsiz retina implantına ötürür. İmplant işığı elektrik impulslarına çevirərək onu beyinə göndərir.
Tədqiqat nəticələrinə əsasən, cihaz yaşa bağlı makula dejenerasiyasından əziyyət çəkən xəstələrin 81 faizində görmə funksiyasını qismən bərpa edib.
Layihə Stanford Universitetinin oftalmologiya professoru Daniel Palanker tərəfindən hazırlanıb və ABŞ şirkəti Science Corporation tərəfindən maliyyələşdirilib. Şirkət hazırda implantın ABŞ və Avropada klinik istifadəsi üçün təsdiq almasını gözləyir.
