Aralıq dənizi mətbəxinin vazkeçilməz hissəsi olan zeytun səhər yeməyi süfrələrimizin baş tacıdır. Ümumiyyətlə qara və yaşıl zeytun kimi tanınsa da, son zamanlar fərqli bir zeytun növü diqqət çəkməyə başlayıb. Yetişməmiş zeytunların erkən mərhələsində qırmızımtıl rəng alması ilə tanınan qırmızı zeytun sağlamlıq faydalarına görə digərlərindən daha qiymətli hesab edilir.
E-saglam.az xəbər verir ki, qırmızı zeytun adətən qara və ya yaşıl zeytunların yetişmə prosesi zamanı müvəqqəti olaraq qırmızı rəng əldə edir. Tam yetişməmişdən əvvəl toplanan bu zeytunlar süfrə zeytunu kimi geniş yayılmasa da, son illərdə aparılan araşdırmalar onun sağlamlığa faydalarını üzə çıxarıb.
Qırmızı zeytunun faydaları
Qırmızı zeytun yüksək miqdarda antioksidantlarla zəngindir. Bu antioksidantlar orqanizmi sərbəst radikalların zərərli təsirlərindən qoruyur, hüceyrələrin qocalmasının qarşısını alır və immunitet sistemini gücləndirir.
Polifenollar qırmızı zeytunun antioksidant xüsusiyyətlərini artıran əsas birləşmələrdir. Qırmızı zeytun qara və yaşıl zeytundan əhəmiyyətli dərəcədə daha çox polifenol ehtiva etdiyi üçün iltihabı azaltmaqda və ürək sağlamlığını dəstəkləməkdə mühüm rol oynayır.
Tərkibindəki yüksək polifenol və oleuropein damarları qoruyur, qan təzyiqini tənzimləyir və ürək xəstəlikləri riskini azalda bilər. Zeytun sağlam yağlarla zəngin olan ürək dostu qida mənbəyidir.
Qırmızı zeytun həzm sistemi üçün də olduqca faydalıdır. Tərkibindəki liflər bağırsaq sağlamlığını dəstəkləyir, nizamlı həzmi təmin edir və həzm sisteminin florasını yaxşılaşdırmağa kömək edir.
Zeytunun tərkibindəki yağlar və antioksidantlar dəri sağlamlığını yaxşılaşdırır. Qırmızı zeytun dəridə iltihabı azalda, qocalma əlamətlərinin qarşısını ala və dərini nəmləndirə bilər.
Qırmızı zeytunu necə istehlak etməli?
Qırmızı zeytun adətən birbaşa istehlak edilmir, çünki yetişməmiş halda acı dada malik ola bilər. Buna görə də süfrədə istifadə edilməzdən əvvəl adətən duzlanır və ya fermentləşdirilir. Bu zeytun növü Aralıq dənizi mətbəxində, xüsusilə souslarda və zeytun yağlı yeməklərdə məşhur şəkildə istifadə edilir. Həmçinin, ədviyyatlar əlavə edilərək daha ətirli hala gətirilə bilər.
Tərcümə: Könül Oruc
