Kolon xərçəngi riskini azaltmaq üçün bahalı qida əlavələrinə ehtiyac yoxdur. Mütəxəssislər bildirir ki, sadə və ucuz bir qida— qatıq, bu xəstəliklə mübarizədə mühüm rol oynaya bilər.
E-saglam.az xəbər verir ki, hər gün bir porsiya qatıq yemək sağlamlığınıza ciddi təsir göstərə bilər. Son illərdə bağırsaq xərçəngi hallarının artması narahatlıq doğurur. Xüsusilə gənclər arasında bu xəstəliyin yayılması diqqət çəkir. Mütəxəssislər bağırsaq xərçənginin yaranma səbəbləri arasında qeyri-sağlam qidalanmanın mühüm rol oynadığını bildirir.
Qatığın xərçəngə qarşı qoruyucu təsiri
Ultra emal olunmuş qidaların istehlakı artdıqca, alimlər bəzi qidalanma vərdişlərinin xərçəngin qarşısını almaqda faydalı ola biləcəyini vurğulayır. Onkoloq və biotibbi elmlər professoru Justin Stebbing qatığın, xüsusilə müntəzəm istehlak edildikdə, aqressiv xərçəng növlərinə qarşı qoruyucu təsir göstərə biləcəyini qeyd edir.
Stebbing "Gut Microbes" jurnalında dərc edilən araşdırmaya istinad edərək, qatığın bağırsaq mikrobiomunu gücləndirməklə xərçəng riskini azalda biləcəyini bildirib. Onun sözlərinə görə, sağlam bağırsaq bakteriyaları güclü immun sisteminin əsasını təşkil edir və iltihabı azaldaraq xərçəng riskini minimuma endirə bilər.
Bununla belə, qatığın növü də vacibdir. Şəkər əlavə olunmuş qatıq növləri sağlamlığa faydadan çox zərər verə bilər. Mütəxəssislər düz, tam yağlı yunan qatığının ən faydalı canlı bakteriyaları ehtiva etdiyini və bağırsaq sağlamlığı üçün ən yaxşı seçim olduğunu vurğulayırlar.
Tərcümə: Könül Oruc
