Kələm turşusu ən faydalı qida məhsullarından biri sayılır. Mütəxəssislər bu sadə və eyni zamanda unikal məhsulun müalicəvi xüsusiyyətlərini çox yüksək qiymətləndirir.
E-saglam.az Yenisabah.az-a istinadla kələm turşusunun 3 inanılmaz faydası haqqında məlumat təqdim edir.
1. Təbii immunomodyulator
Kələm turşusu immun sistemi üçün ən faydalı məhsullardan biridir. İmmun sisteminin vəziyyəti bağırsaq mikroflorasının vəziyyəti ilə sıx bağlıdır. Mikroflora pozulduqda (bu zaman ziyanlı bakteriyalar çoxalır, faydalı bakteriyalar isə azalır) immun sistemi zəifləyir.
Kələm təbii prebiotik və probiotikdir. Prebiotiklər bağırsaqlarda xeyirli mikroorqanizmlərin çoxalmasına kömək edir. Probiotiklər isə, sadə dildə desək, faydalı mikrofloranın özüdür. Beləliklə, kələm turşusu bağırsaqların mikroflorasını bərpa etmək və saxlamaq üçün əvəzsiz məhsuldur.
2. Xərçəng əleyhinə təsir
Kələmin tərkibində olan indol-3-karbinol maddəsi güclü xərçəng əleyhinə təsirə malikdir. Sübut olunub ki, bu maddə süd vəzi və bağırsaq xərçənginin riskini azaldır, hüceyrələrdə bərpa proseslərini sürətləndirir. Xərçəng xəstəliyinə tutulmuş və bu xəstəlikdən sağalan insanlar da kələm turşusunu qidalanmasına əlavə etməlidir.
3. Qəbizlik və babasilə qarşı
Kələm turşusu bağırsaqların vəziyətinə və fəaliyyətinə çox müsbət təsir edir, qəbizlikdən azad edir, babasilin inkişafını ləngidir.
