Podoloq Beste Altınordu ayaq gigiyenasının infeksiyaların və pis qoxunun qarşısını almaqda mühüm rol oynadığını bildirib.
E-saglam.az xəbər verir ki, gün ərzində ayaqların tərləməsi rütubəti artırır və bakteriyalar üçün əlverişli mühit yaradır. Xüsusilə stafilokok bakteriyaları tərdəki amin turşularını parçalayaraq kəskin qoxuya səbəb olur.
Ayaqlarda yayılmış problemlərdən biri olan göbələk infeksiyası rütubət səbəbindən barmaq aralarında asanlıqla yayılır. Dəri bariyerinin pozulması bakteriyaların dərinin dərin qatlarına nüfuz etməsinə və selülit kimi ciddi infeksiyalara səbəb ola bilər.
Diabet xəstələri isə ayaq gigiyenasına daha çox diqqət etməlidir. Qan dövranının zəifləməsi səbəbindən kiçik yaralar belə gec sağalır və ciddi infeksiyalara çevrilə bilər.
Ayaqları gündə ən az bir dəfə sabunla yumaq, xüsusilə barmaq aralarını yaxşıca qurulamaq vacibdir. Nəfəs alan pambıq corablar geyinmək və ayaqqabıları hər gün dəyişmək infeksiyaların qarşısını almağa kömək edir. Ayaq sağlamlığı ümumi bədən sağlamlığı üçün vacibdir və düzgün qayğı ilə göbələk, bakteriya və pis qoxunun qarşısını almaq mümkündür.
Tərcümə: Könül Oruc
