Aşağı qan təzyiqi (hipotoniya) halsızlıq, başgicəllənmə və zəiflik kimi əlamətlərlə özünü göstərə bilər.
E-saglam.az xəbər verir ki, ümumi praktikant Denis Prokofyev bildirib ki, bəzi hallarda qan təzyiqini dərman qəbul etmədən də müvəqqəti olaraq yüksəltmək mümkündür.
Həkimin sözlərinə görə, ilk üsul duz qəbulunu artırmaqdır. Bu, yeməyə bir qədər duz əlavə etməklə və ya duzlu qidalar qəbul etməklə həyata keçirilə bilər. Duz orqanizmdə mayenin saxlanmasına kömək edərək qan təzyiqinin yüksəlməsinə təsir göstərə bilər.
İkinci üsul kofein tərkibli içkilərdən istifadə etməkdir. Qəhvə, çay və digər kofeinli içkilər bəzi insanlarda təzyiqi qısa müddətə yüksəldə bilər. Lakin həkim vurğulayır ki, bu üsul mədə xorası, diabet və bəzi digər xəstəlikləri olan şəxslər üçün uyğun olmaya bilər.
Üçüncü seçim isə tünd şokoladdır. Tərkibindəki maddələr bəzi hallarda qan təzyiqinin müvəqqəti yüksəlməsinə kömək edə bilər.
Bununla belə, mütəxəssis xəbərdarlıq edir ki, duzun, kofeinin və tünd şokoladın həddindən artıq qəbulu sağlamlıq üçün zərərli ola bilər. Buna görə də bu üsullardan yalnız ehtiyac olduqda istifadə etmək və onları vərdiş halına gətirməmək tövsiyə olunur.
Həkimin sözlərinə görə, aşağı qan təzyiqi çox vaxt müstəqil xəstəlik deyil, başqa bir sağlamlıq probleminin əlaməti ola bilər. Əgər təzyiq tez-tez aşağı düşür, başgicəllənmə, huşun itməsi və ya digər narahatedici əlamətlərlə müşayiət olunursa, səbəbin müəyyənləşdirilməsi üçün mütləq həkimə müraciət etmək lazımdır.
Tərcümə: Könül Oruc
