Onkoloq Vladimir İvaşkov bildirib ki, bir çox insan alma yeyərkən vacib bir səhvə yol verir.
E-saglam.az xəbər verir ki, o, bu barədə öz Telegram kanalında paylaşım edib.
Həkimin sözlərinə görə, almalar çox vaxt özəyi və toxumları atılaraq yeyilir. Halbuki bu hissələrdə çox sayda faydalı bakteriya mövcuddur. İvaşkov qeyd edir ki, alma özəyində və toxumlarında 100 milyona qədər faydalı bakteriya ola bilər və bu, meyvənin pulpası ilə müqayisədə təxminən 10 dəfə çoxdur.
Mütəxəssis bildirib ki, bu bakteriyalar bağırsaq mikrobiomunu dəstəkləyir, immunitet sistemini gücləndirir və orqanizmdə iltihabi proseslərin azalmasına kömək edir.
Bununla belə, həkim bəzi insanlara ehtiyatlı olmağı tövsiyə edib. Mədə-bağırsaq xəstəlikləri olan şəxslər və üç yaşdan kiçik uşaqlar alma toxumlarını yeməməlidirlər.
İvaşkov həmçinin alma toxumlarının təhlükəli olması ilə bağlı geniş yayılmış fikrə də aydınlıq gətirib. Onun sözlərinə görə, toxumlarda amiqdalin adlı maddə var və bu maddə bağırsaqda siyanidə çevrilə bilər. Lakin zəhərli təsir yaratmaq üçün bir yetkin insanın təxminən 200 toxumu çeynəməsi lazımdır. Halbuki bir almada adətən cəmi 5–8 toxum olur.
Tərcümə: Könül Oruc
