Gözlənilməz yerlərdə yaranan ağrılar ürək problemlərinin əlaməti ola bilər.
E-saglam.az-ın məlumatına görə, kardioloqlar nadir, lakin son dərəcə təhlükəli bir vəziyyət olan spontan koronar arteriya disseksiyası barədə xəbərdarlıq edirlər. Britaniya Ürək Fondunun məlumatına görə, bu hal ürəyi qidalandıran arteriyanın daxili qatının qopması nəticəsində yaranır və qan laxtalanmasına, infarkt riskinə səbəb ola bilər.
Bu xəstəlik xüsusilə məkrli sayılır, çünki çox vaxt yüksək xolesterol və ya yaş kimi klassik risk faktorları olmayan insanlarda ortaya çıxır. Əksər hallarda qəfil inkişaf edir və əvvəlcədən heç bir ciddi xəbərdarlıq əlaməti vermir.
Əsas risk qrupu 45-53 yaş arası qadınlardır. Xüsusilə hamiləlik dövründə və ya doğuşdan sonrakı mərhələdə olan qadınlar daha həssas hesab olunur. Statistikaya görə, halların təxminən 80 faizi qadınların payına düşür.
Xəstəliyin simptomları təkcə sinə ağrısı ilə məhdudlaşmır. Ağrı və ya gərginlik qollarda, boyunda, çənədə, beldə və hətta qarın nahiyəsində də hiss oluna bilər. Bu da vəziyyətin tez-tez başqa problemlərlə qarışdırılmasına səbəb olur.
Bundan əlavə, nəfəs darlığı, ürəkbulanma, soyuq tər, başgicəllənmə və həddindən artıq yorğunluq da müşahidə edilə bilər. Bu əlamətlər infarkt öncəsi vəziyyətin göstəricisi ola bilər.
Britaniya Ürək Fondu xəbərdarlıq edir ki, bu simptomlardan hər hansı biri ortaya çıxarsa, vaxt itirmədən təcili tibbi yardım çağırmaq lazımdır. Erkən müdaxilə insan həyatını xilas edə bilər.
Tərcümə: Könül Oruc
