Məşhur britaniyalı müğənni Elton Con 77 yaşında görmə qabiliyyətini itirdiyini açıqlayıb.
E-saglam.az xəbər verir ki, o, Londonda keçirilən və musiqisini bəstələdiyi yeni “The Devil Wears Prada” musiqili tamaşasının qırmızı xalça mərasimində səhnəni görə bilmədiyini, lakin tamaşadan zövq aldığını deyib.
Müğənni iyul ayında Fransanın cənubunda tətil zamanı infeksiya nəticəsində sağ gözünün tamamilə görmə qabiliyyətini itirdiyini və sol gözündə yalnız məhdud görmə olduğunu deyib. Bu səbəbdən o, yeni albomunun ləngidiyini və studiyada işləməyin onun üçün çətin olduğunu vurğulayıb.
Müğənni həkimlərin və ailəsinin dəstəyi ilə sağalacağına ümid etdiyini bildirib. (modern.az)
