Soyuq qış aylarında elektrik qızdırıcıları həyatımızı asanlaşdırsa da, uzun müddət istifadəsi bəzi dəri problemlərinə səbəb ola bilər.
E-saglam.az xəbər verir ki, mütəxəssislər xəbərdarlıq edir ki, qızdırıcı və digər istilik mənbələri ilə yaxın təmas dərinin rəngində dəyişikliklər və ciddi narahatlıqlar yarada bilər.
"Eritema Ab İgne" xəstəliyi nədir?
Bağcılar Medipol Mega Universiteti Xəstəxanasından dermatoloq prof. dr. Əli Balevi bildirib ki, elektrik qızdırıcıları ilə uzun müddət təmas nəticəsində dəri səthində "Eritema Ab İgne" adlı vəziyyət yarana bilər. Bu, xroniki istilik təsirinə məruz qalan dəridə tünd qəhvəyi və mavimtıl ləkələrin əmələ gəlməsi ilə müşahidə edilir.
Dərinin reaksiyası necə olur?
Prof. dr. Balevinin sözlərinə görə, xəstələr dəridə anormal görünüş və ya ləkələrlə müraciət etdikdə, problemin qızdırıcı ilə uzun müddət təmasdan qaynaqlandığı ortaya çıxır. Bu vəziyyət xüsusilə ayaq nahiyəsində daha çox müşahidə edilir. Təkrarlanan istilik təsiri ilə dəri hüceyrələrində dəyişikliklər baş verir, nəticədə dəridə qalıcı ləkələr yaranır.
Biopsiya tələb oluna bilər
İlk mərhələlərdə istilik mənbəyindən uzaqlaşmaq və dərini təmasdan qorumaq problemin geriləməsinə kömək edə bilər. Lakin bəzi hallarda, dəridə meydana gələn dəyişikliklərin daha ciddi xəstəliklərin əlaməti ola biləcəyi ehtimal edilir. Anormal dəri çıxıntıları və ya çökmələri müşahidə edildikdə, şiş inkişafını istisna etmək üçün biopsiya tələb oluna bilər.
Mütəxəssislərdən məsləhətlər:
Qızdırıcıları dəridən uzaq tutun: Qızdırıcını bədənə çox yaxın yerləşdirməkdən çəkinin.
İstidən qorunma tədbirləri alın: Ayaqlarınızı və ya digər nahiyələri uzun müddət istilik mənbəyinə məruz qoymayın.
Dəri reaksiyasına diqqət yetirin: Dəridə qızartı, ləkə və ya anormal görünüşlər olduqda dermatoloqa müraciət edin.
Erkən müdaxilə əhəmiyyətlidir: Problemin başlanğıc mərhələsində istilik mənbəyindən uzaqlaşmaq dərinin özünü bərpa etməsinə kömək edə bilər.
Elektrik qızdırıcılarının düzgün istifadəsi sağlamlığınızı qorumaq və dəri problemlərindən qaçmaq üçün əsas şərtdir. Bu sadə tədbirlərlə qış aylarını təhlükəsiz və rahat keçirə bilərsiniz.
Tərcümə: Könül Oruc
