ABŞ alimləri düyü dənəsindən kiçik olan və bədənə yeridilə bilən dünyanın ən kiçik kardiostimulyatorunu hazırlayıblar. Müvəqqəti ürək tənzimləyicisi kimi dizayn edilən bu yeni cihaz işıqla idarə oluna bilir və müəyyən müddətdən sonra bədəndə öz-özünə əriyir.
E-saglam.az xəbər verir ki, alimlər yeni cihazın insanlarda sınaqdan keçirilməsinə hələ bir neçə il qaldığını bildirsələr də, bu simsiz kardiostimulyator tibbdə yenilikçi ixtira hesab olunur.
Müvəqqəti kardiostimulyatorlara yeni alternativ
Dünyada milyonlarla insanın ürək ritmini tənzimləmək üçün elektrik impulsları göndərən daimi kardiostimulyatorlara ehtiyacı var. Bununla belə, yeni hazırlanan cihazın xüsusilə anadangəlmə ürək xəstəliyi ilə doğulan və əməliyyatdan sonra müvəqqəti kardiostimulyatora ehtiyacı olan körpələr üçün əhəmiyyətli bir həll təklif etməsi gözlənilir.
Yetkin xəstələrdə ürək əməliyyatından sonra normal ritmlərinə qayıtmalarına kömək etmək üçün istifadə oluna biləcəyi də bildirilir.
Cari müvəqqəti kardiostimulyatorlar ürək əzələsinə tikilmiş elektrodlar və xəstənin sinəsinə bağlanan naqillərlə işləyir. Bununla belə, batareyanın çıxarılması zamanı bəzi fəsadlar yarana bilər. Məsələn, 2012-ci ildə müvəqqəti kardiostimulyatoru çıxarılan ABŞ astronavtı Nil Armstronqun daxili qanaxmadan öldüyü məlumdur.
Orqanizmdə özbaşına həll olur
Yalnız 1 millimetr qalınlığında və 3,5 millimetr uzunluğunda yeni hazırlanmış simsiz kardiostimulyator şprisin ucuna sığacaq qədər kiçikdir. Cihaz xəstənin sinəsinə yapışdırılmış yumşaq yamaq ilə birləşdirilir. Yamaq nizamsız ürək döyüntülərini aşkar etdikdə, kardiostimulyatora hansı ritmin stimullaşdırılması lazım olduğunu bildirmək üçün işıq siqnalları göndərir.
Bədən mayeləri vasitəsilə kimyəvi enerjidən elektrik enerjisi çıxaran galvanik hüceyrə ilə işləyən cihazın bu günə qədər laboratoriya mühitində siçan, siçovul, donuz, it və insan ürək toxumalarında uğurlu nəticələr göstərdiyi bildirilib.
Tərcümə: Yeganə
