"Sağlamlığı qorumaq üçün təkcə gündə iki dəfə dişləri təmizləmək deyil, həm də bir sıra tövsiyələrə əməl etmək və diş qulluğunda səhvlərə yol verməmək vacibdir".
E-saglam.az-ın gazeta.ru-ya istinadla məlumatına görə, bu barədə rusiyalı terapevt-stomatoloq və parodontoloq Kseniya Klimova xəbərdarlıq edib.
O, diş qulluğunda geniş yayılmış səhvlər haqqında danışıb və onlardan necə qaçmaq barədə tövsiyələr verib. Həmin məsləhətləri təqdim edirik:
Səhər yeməyindən əvvəl diş fırçalamaq
Səhər yeməyindən əvvəl diş fırçalamaq vərdişi rahat görünə bilər, lakin əslində sağlamlıq üçün zərərlidir. Yeməkdən sonra dişlər arasında qida qalıqları qalır ki, bu da bakteriyaların çoxalması üçün əlverişli mühit yaradır. Buna görə stomatoloqlar yeməkdən sonra diş fırçalamağı tövsiyə edirlər.
Yatmazdan əvvəl fırçalamağa etinasızlıq
Bəzi insanlar yatmazdan əvvəl sadəcə ağızlarını yaxalamaqla kifayətlənirlər, lakin bu, kifayət deyil. Gecə vaxtı dişləri yaxşı təmizləməmək bakteriyaların toplanmasına, mina qatının dağılmasına və kariyesin inkişafına səbəb olur.
Diş fırçasından düzgün istifadə etməmək
Digər geniş yayılmış səhv diş fırçasından düzgün istifadə edilməməsidir. Məsələn, aqressiv diş fırçalamaq diş ətinin zədələnməsinə və pazşəkilli qüsurların əmələ gəlməsinə səbəb ola bilər. Ən yaxşısı fırçanın fərdi olaraq seçilməsidir. Bunda stomatoloq kömək edə bilər. Bundan əlavə, yadda saxlamaq lazımdır ki, fırçanı iki-üç aydan artıq istifadə etmək məsləhət deyil. Əks halda, diş ətinin iltihablanması riski əhəmiyyətli dərəcədə artır.
Diş məcununun düzgün seçilməməsi
Diş pastaları müxtəlif tərkibə malikdir və hər biri dişlərin, diş ətinin vəziyyətinə fərqli şəkildə təsir göstərir. Buna görə də, onların seçiminə düzgün yanaşmaq lazımdır. Xüsusilə, ağardıcı pastaları həddindən artıq tez-tez istifadə etmək məsləhət deyil, çünki bu, dişlərin həssaslığını artıra və hidroksiapatit dağılmasına səbəb ola bilər. Optimal məcun seçimi üçün də stomatoloqla məsləhətləşmək lazımdır.
Ağız boşluğuna kifayət qədər qulluq etməmək
Fırça və məcundan istifadə dişlərə tam qulluq üçün kifayət deyil. Bakteriyaları və qida qalıqlarını təmizləmək üçün diş ipi və irriqatordan da istifadə etmək lazımdır. Bu, kariyesin və diş əti xəstəliklərinin inkişafının qarşısını almağa kömək edəcək.
Həkim bildirib ki, hətta narahatlıq olmasa belə, hər altı aydan bir planlı müayinə üçün stomatoloqa gedilməlidir. (Oxu.az)
