Uşaqlıqdan bəri bir çox insanın sevmədiyi pırasa əslində sağlamlıq üçün ən faydalı tərəvəzlərdən biri hesab olunur. Mütəxəssislər bildirirlər ki, bu tərəvəz xüsusilə ürək-damar sisteminin qorunmasında mühüm rol oynayır və zəngin qida tərkibi ilə orqanizmə çoxsaylı faydalar verir.
E-saglam.az xəbər verir ki, qida mütəxəssislərinin sözlərinə görə, soğan və sarımsaq ailəsinə aid olan pırasa güclü antioksidantlar, vitaminlər və liflə zəngindir.
Pırasanın tərkibində olan kaempferol adlı flavonoid qan damarlarını sərbəst radikalların zərərli təsirindən qorumağa kömək edir. Mütəxəssislər bildirirlər ki, bu maddə damarların elastikliyini artırır, qan dövranını yaxşılaşdırır və "pis" xolesterol (LDL) səviyyəsinin azalmasına dəstək ola bilər. Pırasanın müntəzəm qəbulu ürək-damar xəstəlikləri riskinin azalmasına töhfə verə bilər.
İmmunitet və bağırsaq sağlamlığı üçün faydalıdırPırasanın tərkibindəki kükürd birləşmələri hüceyrələrin qorunmasına kömək edir. Bundan əlavə, C və K vitaminləri immun sistemini dəstəkləyir, yüksək lif və prebiotik tərkibi isə bağırsaq mikrobiotasının sağlamlığını qorumağa və həzmi yaxşılaşdırmağa kömək edir.
Düzgün bişirilməsi vacibdirMütəxəssislər qeyd edirlər ki, pırasanın qida dəyərinin qorunması üçün onu həddindən artıq bişirmək məsləhət görülmür. Tərəvəz yalnız ənənəvi zeytun yağlı yemək kimi deyil, həm də şorbalarda, sobada qızardılmış şəkildə, kiş və digər müxtəlif yeməklərin hazırlanmasında istifadə oluna bilər.
Mütəxəssislərin fikrincə, düzgün hazırlanmış pırasa həm dadı, həm də yüksək qida dəyəri ilə gündəlik rasionun faydalı hissəsinə çevrilə bilər.
Tərcümə: Könül Oruc
