Diyetoloq Fatma Gizem Bahadır yayda sevilən meyvələrin — çiyələk, gilas və albalının sağlamlığa təsirindən danışıb.
E-saglam.az xəbər verir ki, onun sözlərinə görə, bu qırmızı meyvələr antioksidantlarla zəngindir, immuniteti gücləndirir, ürək xəstəliklərindən qoruyur və qocalmanı gecikdirir.
Qarpız və qovun nə üçün faydalıdır?
Qarpız: Yüksək su tərkibi ilə bədəni nəmləndirir, C vitamini ilə immuniteti dəstəkləyir və liflə qəbizliyin qarşısını alır. Porsiya nəzarəti ilə istehlak edilərsə, qan şəkərinə az təsir edir.
Qovun: Həmçinin su və liflə zəngindir, A, C, B6 vitaminləri, kalium və fol turşusu ilə həzmi asanlaşdırır.
Meşə meyvələri və ürək sağlamlığı
Çiyələk, albalı, gilas, böyürtkən, qaragilə, tut kimi meyvələr:
Ürək və damar sistemini qoruyur;
Antikanserogen və antioksidant təsirə malikdir;
Yaddaşı və immuniteti dəstəkləyir;
Qan şəkərini sürətlə yüksəltmir.
Diabet xəstələri necə yeməlidir?
Meyvələr:
Porsiya nəzarəti ilə və zülal mənbəyi ilə (qatıq, kefir, süd, fındıq və s.) birlikdə yeyilməlidir.
Məsələn: 10 çiyələk + qatıq və ya 2 incə qarpız dilimi + kefir.
Meyvə şirəsindən uzaq durmaq tövsiyə olunur.
Hamilələr üçün uyğun meyvələr
Çiyələk: C vitamini və fol turşusu mənbəyidir.
Şaftalı: Kaliumla zəngindir, əzələ spazmını azaldır.
Qaragilə və albalı: Təbii antioksidantlar, maqnezium və liflə zəngindir.
Qarpız və tut: Dəmir və C vitamini ilə faydalıdır, amma nəzarətlə yeyilməlidir.
Meyvəni necə və nə vaxt yeməli?
Ən uyğun vaxt: Səhər-günorta və ya günorta-axşam arası;
Əsas yeməkdən 1-2 saat əvvəl yemək tövsiyə olunur;
Həddindən artıq meyvə qaz, şişkinlik və qan şəkərində nizamsızlığa səbəb ola bilər.
Saxlama və alış zamanı diqqət
Meyvələr yumadan soyuducuda saxlanılmalıdır.
Banan, şaftalı, nektarin otaq temperaturunda saxlana bilər.
Alarkən:
Mövsüm meyvəsi seçin;
Rəngi və təbii parıltısı olsun;
Ləkəli, çox sərt/yumşaq və çox iri meyvələrdən qaçın.
Tərcümə: Könül Oruc
