Rusiya Qida Keyfiyyəti Təşkilatı – Roskaçestvo Qida Təhlükəsizliyi Kompetensiya Mərkəzinin direktoru Yelena Spetsenko az miqdarda kif aşkarlanan məhsulların belə istehlak edilməsinin ciddi təhlükə daşıdığını bildirib.
E-saglam.az xəbər verir ki, Lenta.ru saytına verdiyi açıqlamada o, bu cür məhsulların istifadəsinin risklərinə diqqət çəkib.
Görünməyən təhlükə: mikroskopik saplar və toksinlər
Spetsenko izah edir ki, kif göbələkləri məhsulun səthində görünsə də, əslində toxumanın dərinliklərinə mikroskopik şəkildə nüfuz edə bilir. Yəni yalnız görünən hissəni kəsməklə qalan qida təhlükəsiz olmur. Üstəlik, bəzi kif növləri istiliyə davamlı toksinlər ifraz edir. Bu toksinlər orqanizmdə yığılaraq xroniki xəstəliklərə yol aça bilər.
Xüsusilə yumşaq qidalara diqqət!
Mütəxəssis qeyd edir ki, nəmliyi yüksək və yumşaq qidalar daha çox təhlükə yaradır. Buraya meyvələr, tərəvəzlər, çörək və süd məhsulları daxildir. Kif göründükdən sonra bu qidaların istifadəsi məsləhət görülmür. Məsələn, aflatoksinlər adlanan toksinlər fındıq, dənli bitkilər və hətta mürəbbələrdə belə rast gəlinir və qaraciyərə zərər verə bilər.
İstisna hallarda nə etmək olar?
Az nəmli, sərt məhsullar – məsələn, sərt pendir və qurudulmuş kolbasalarda isə kifli hissə 1–2 sm artıq qatla birlikdə kəsilərək atıla bilər. Amma burada da kifin rəngi və qoxusuna diqqət yetirmək vacibdir. Qeyri-adi çalalar və kəskin qoxular məhsulun tamamilə atılmalı olduğunu göstərir.
Sporlar görünməsə də mövcuddur
Kif göbələkləri sporlarla çoxaldığı üçün bəzən görünməsələr belə səthlərdə ola bilərlər. Buna görə də kiflənmiş məhsul saxlanılıbsa, soyuducu və qabların yaxşıca yuyulması tövsiyə olunur.
Sağlamlıq üçün risk qrupları
Spetsenko xəbərdarlıq edir ki, kif toksinlərinin az miqdarda və mütəmadi şəkildə qəbulu xroniki qaraciyər xəstəlikləri, allergiyalar və immun sisteminin zəifləməsinə səbəb ola bilər. Uşaqlar, hamilə qadınlar və xroniki xəstəliyi olanlar bu baxımdan daha çox risk altındadırlar.
Nə etməli?
Mütəxəssislər tövsiyə edirlər ki, məhsulun təhlükəsizliyinə şübhə varsa, ondan imtina etmək daha doğrudur. Bunun qarşısını almaq üçün qidaların saxlama şərtlərinə və son istifadə tarixlərinə xüsusi diqqət yetirilməlidir.
Tərcümə: Könül Oruc
