Mütəxəssislər isti havalarda avtomobildə saxlanılan plastik butulkalardan su içməyin sağlamlıq üçün təhlükəli olduğunu bildirirlər.
E-saglam.az xəbər verir ki, araşdırmalar göstərir ki, yüksək temperatur plastikdən suya mikroplastik və zərərli kimyəvi maddələrin keçməsinə səbəb ola bilər. Bu maddələr xərçəng, reproduktiv problemlər və ürək-damar xəstəlikləri ilə əlaqələndirilir.
Çinin Nankin Universitetində aparılan bir təcrübədə PET plastik şüşələr dörd həftə ərzində isti şəraitdə saxlanılıb. Nəticədə suda zəhərli ağır metal – sürmə və endokrin sistemi pozan bisfenol A (BPA) aşkarlanıb.
Mütəxəssislərin sözlərinə görə, cəmi 27 dərəcə havada belə avtomobilin içi 20 dəqiqədə 40 dərəcəyə, bir saata isə 59 dərəcəyə qədər qızır. Bu da şüşələrdən kimyəvi maddələrin suya sızmasını sürətləndirir.
Sürmə qısa müddətdə baş ağrısı, ürəkbulanma və yuxu problemlərinə, uzunmüddətli təsirdə isə mədə-bağırsaq xəstəliklərinə səbəb ola bilər. BPA isə xərçəng və vaxtından əvvəl ölüm riskini artırır.
Son elmi işlər həmçinin göstərir ki, nanoplastiklər DNT zədələnməsinə, genlərin fəaliyyətində dəyişikliklərə və bədxassəli şişlərin yaranmasına təkan verə bilər.
Tərcümə: Könül Oruc
