İnternetdə atlama ipi ilə "əriməyin" möcüzəvi nəticələrini nümayiş etdirən videolar getdikcə çoxalır. Görünüşə görə, ucuz, praktik və son dərəcə effektiv bir vasitədir. Lakin fitnes mütəxəssisi bu populyar inanışın arxasındakı həqiqəti açıqladı.
E-saglam.az xəbər verir ki, Evotren fitnes məktəbinin mentoru Maksim Oborin məsələni birmənalı şəkildə izah edir: atlama ipi özlüyündə yağ yandırmır. Yağ yalnız ümumi kalori çatışmazlığı olduqda itirilir. Atlama ipi isə sadəcə enerji sərf etməyin bir yoludur.
Üstəlik, bu yol oynaqlar üçün olduqca ağırdır. Hər enişdə topuqlar və diz oynaqları bədən çəkisindən dəfələrlə artıq şok yükü alır. Mütəxəssisə görə, əlavə 15-20 kiloqram çəkisi olan və bağları məşq görmüş insanlar üçün atlama ipi birbaşa əks göstərişdir.
"Tərəzidə ilk müsbət nəticəni görməzdən çox əvvəl periostit və ya Axilles tendiniti inkişaf etdirəcəksiniz. Daha ağır çəkili insanlar üçün bu sadəcə zədə ruletinin bir formasıdır", - deyə Oborin xəbərdar edir.
Düzgün istifadə necə olmalıdır?
Oynaqlar sağlamdırsa və atlama ipini kardio məşqinə əlavə etmək istəyirsinizsə, mütəxəssis bir neçə qaydaya əməl etməyi tövsiyə edir.
Fasiləsiz uzun müddət atlamaqdan çəkinin - baldır əzələləri tez yorulacaq və yerə eniş texnikası pozulacaq. Bunun əvəzinə interval üsulundan istifadə edin: 40 saniyə yavaş temp, ardınca 20-30 saniyə istirahət. Həftədə bir neçə dəfə güc məşqinin sonunda 10-15 dəqiqəlik belə bir blok əzələ-skelet sisteminə zərər vermədən yaxşı metabolik effekt verəcək.
Tərcümə: Könül Oruc
