Armud faydalı meyvə olsa da, düzgün istehlak edilmədikdə bəzi sağlamlıq problemlərinə səbəb ola bilər.
E-saglam.az xəbər verir ki, qidalanma mütəxəssisləri bildirirlər ki, liflə zəngin olan armud həzmi yaxşılaşdırır, amma acqarına və həddindən artıq yeyildikdə mədə turşusunu artıraraq ağrı, şişkinlik və həzmsizlik yarada bilər. Çox lif qəbul etmək isə bağırsaq qazı və ishala gətirib çıxara bilər.
Yetişmiş və şəkəri yüksək olan armudun nəzarətsiz yeyilməsi, xüsusilə diabet xəstələrində qan şəkərinin dəyişməsinə səbəb olur. Ona görə də mütəxəssislər armudun yeməkdən sonra və orta miqdarda qəbul edilməsini tövsiyə edirlər.
Xarab və çürük armud isə qida zəhərlənməsi riski daşıyır. Buna görə ən yaxşı seçim təzə, təmiz və porsiyaya nəzarətlə yeyilən armuddur.
Armudun faydaları
Mütəxəssislərin sözlərinə görə, armud ürək-damar sağlamlığını qoruyur, həzmi dəstəkləyir və immuniteti gücləndirir. Payız və qış aylarında pəhrizə əlavə edildikdə soyuqdəymə və digər xəstəliklərə qarşı qoruyucu təsir göstərir.
Armud lif, antioksidant, C və K vitaminləri ilə zəngindir. Onun müntəzəm istifadəsi yaraların sağalmasına kömək edir, dəmir çatışmazlığının qarşısını alır və xroniki xəstəliklərə qarşı bədəni gücləndirir.
Armudu necə yemək lazımdır?
Mütəxəssislər bildirirlər ki, armudu mövsümündə və dərisi ilə yemək daha faydalıdır. Belə istehlak immunitet, ürək və bağırsaqlar üçün əlavə dəstək verir. Qışa hazırlıqda armudu orta miqdarda pəhrizə daxil etmək güclü immunitetin qorunmasına kömək edir.
Tərcümə: Könül Oruc
