8 Mart münasibətilə qadınlar üçün ən faydalı hədiyyə seçimləri açıqlanıb.
E-saglam.az xəbər verir ki, mütəxəssislər bildirir ki, bu gün üçün ən dəyərli hədiyyələrdən biri sağlamlığa yönəlmiş seçimlərdir.
Ulyana Maxova bildirir ki, qadınlara verilə biləcək ən faydalı hədiyyələrdən biri tibbi müayinə üçün sertifikatdır. Onun sözlərinə görə, belə bir hədiyyə qadının öz sağlamlığına diqqət yetirməsinə və vaxtında profilaktik yoxlamalardan keçməsinə kömək edir.
Həkim qeyd edir ki, müayinə paketləri qadının yaşına uyğun seçilməlidir. Məsələn, 20–35 yaş arası qadınlar üçün ginekoloji müayinə, ultrasəs və əsas qan analizləri tövsiyə olunur.
35–50 yaş arası qadınlarda qalxanabənzər vəzin yoxlanılması və ferritin səviyyəsinin müəyyən edilməsi vacib sayılır.
50 yaşdan yuxarı qadınlar üçün isə sümük sıxlığının ölçülməsi (densitometriya), göz müayinəsi və lipid profilinin yoxlanılması məsləhət görülür.
Mütəxəssis əlavə edib ki, sağlamlıqla bağlı digər faydalı hədiyyələr də var. Bunlara ürək ritmini, qanda oksigen səviyyəsini və yuxu keyfiyyətini izləyə bilən ağıllı saatlar və fitnes izləyiciləri daxildir.
Bundan başqa, işıq terapiyası lampaları, hava nəmləndiriciləri, bel və boyun masaj aparatları, evdə idman üçün avadanlıqlar, məşq üzvlükləri və spa prosedurları da həm faydalı, həm də diqqətli hədiyyə seçimləri hesab olunur. Bu cür hədiyyələr qadınların həm sağlamlığını qorumağa, həm də gündəlik stressdən uzaqlaşaraq dincəlməsinə kömək edə bilər.
Tərcümə: Könül Oruc
