Kifoz onurğanın normal əyriliyinin artması nəticəsində belin arxaya doğru əyilməsi ilə xarakterizə olunan ortopedik problemdir. Əksər hallarda bu vəziyyət “qambur” kimi tanınır və həm uşaqlarda, həm də böyüklərdə rast gəlinir.
E-saglam.az xəbər verir ki, həkimlərin sözlərinə görə, kifozun yaranmasına bir çox amillər səbəb ola bilər. Ən çox rast gəlinən səbəblər arasında uzun müddət yanlış oturma, skolioz, onurğa zədələri, osteoporoz, eləcə də əzələ zəifliyi və irsi faktorlar göstərilir. Uşaqlarda isə kifoz adətən sürətli boy artımı dövründə onurğa əyriliyinin düzgün tənzimlənməməsi ilə bağlı yaranır.
Mütəxəssislər bildirirlər ki, xəstəliyin ilkin mərhələsində düzgün duruşun bərpası və fizioterapiya kifayət edə bilər. Daha irəliləmiş hallarda isə xüsusi onurğa korseti, müalicəvi idman, masaj və fiziki reabilitasiya proqramları tətbiq olunur. Nadir hallarda, ağır deformasiyalar zamanı cərrahi müdaxilə zəruri olur.
Həkimlər xəbərdarlıq edirlər ki, kifoz vaxtında müalicə edilməzsə, tənəffüs və ürək fəaliyyətinə mənfi təsir göstərə, xroniki ağrılar və yuxu pozğunluqları yarada bilər.
Mütəxəssislər onurğa sağlamlığını qorumaq üçün uzun müddət oturaq vəziyyətdə qalmamaq, düzgün bədən duruşuna riayət etmək və mütəmadi fiziki hərəkətlərlə məşğul olmağı tövsiyə edirlər.
Nəzrin Abbas
