Skandinaviya Sağlamlıq Mərkəzinin kardioloqu Valeriya Bonadykova bildirib ki, yaş artdıqca həm yuxuya getmək, həm də yuxuda qalmaq daha çətinləşir.
E-saglam.az xəbər verir ki, o, müsahibəsində bu problemlərin əsas tibbi səbəblərini izah edib.
Bonadykova deyir ki, 40-45 yaşdan sonra melatoninin yuxu hormonunun istehsalı tədricən azalır. 70 yaşa çatdıqda bir çox insanlarda melatonin gənclik dövrü ilə müqayisədə nəzərəçarpacaq dərəcədə aşağı olur. Həkimin sözlərinə görə, “bədənə yatmaq vaxtının gəldiyini bildirən gecə siqnalı zəifləyir. Bu isə yuxuya getməni uzadır, daha tez oyanmağa və işığa, səsə qarşı həssaslığın artmasına səbəb olur”.
Bundan əlavə, normalda gecələr azalan, səhərlər isə yüksələn kortizol səviyyəsi yaşlanma və xroniki stress fonunda axşamlar yüksəlməyə başlayır. Bu isə yuxuya getməyi çətinləşdirir, yuxunun dərinliyini azaldır və yuxunun tez-tez bölünməsinə gətirib çıxarır.
Həkim qeyd edib ki, ürək-damar xəstəlikləri də yuxu pozulmalarının əsas səbəblərindəndir. Hipertoniya, xroniki ürək çatışmazlığı, koronar ürək xəstəliyi və ürək ritm pozğunluğu olan insanlarda gecə tez-tez oyanma daha çox müşahidə olunur.
Bonadykovanın fikrincə, bəzi dərman vasitələri də yuxunu poza bilər. Məsələn, günortadan sonra qəbul edilən diuretiklər gecə tualetə getmə tezliyini artırır. Bəzi antiaritmik və təzyiq dərmanları isə gün ərzində yuxululuq yaradır və yuxu ritmini pozur.
Tərcümə: Könül Oruc
