ABŞ-da yüksək təzyiqin müalicəsində istifadə edilən “Ziac” adlı dərmanla bağlı ciddi təhlükəsizlik xəbərdarlığı verilib.
E-saglam.az xəbər verir ki, ABŞ Qida və Dərman Administrasiyası (FDA) 1 dekabr 2023-cü il qərarı ilə dərmanın bir neçə partiyasında gözlənilməz aktiv maddə qalıqları aşkarlandığı üçün ölkə üzrə 11 minədək şüşənin geri çağırılmasına qərar verib.
FDA-nın məlumatına əsasən, tərkibində bisoprolol fumarat və hidroxlortiazid olan preparatın bəzi nümunələrində xolesterolu salan dərmanlarda istifadə edilən ezetimib maddəsinin izləri tapılıb. Bu komponent Ziac dərmanının rəsmi formulunda yoxdur və çarpaz çirklənmə ehtimalı araşdırılır.
Məlumatlara görə, həm Ziac, həm də ezetimib tərkibli preparatlar Nyu-Cersi ştatında yerləşən Glenmark Pharmaceuticals zavodunda eyni istehsal sahəsində emal edilib. Bu da istənməyən qarışıqlığa səbəb ola biləcək əsas faktor kimi qiymətləndirilir. Şirkət vəziyyəti aşkar etdikdən sonra könüllü şəkildə geri çağırma prosesinə başlayıb.
Rəsmilər maddənin miqdarının çox az olduğunu və ciddi sağlamlıq riski yaratmadığını bildirirlər. Lakin xəstələrə dərmanı özbaşına dayandırmamaq və həkimlə məsləhətləşmək tövsiyə olunur.
FDA geri çağırma ilə bağlı araşdırmaların davam etdiyini və yeni məlumatların ictimaiyyətə açıqlanacağını bildirib.
Tərcümə: Könül Oruc
