2013-cü ildə baş verən ağır xizək qəzasından sonra uzun müddət gizli müalicə alan Formula 1 əfsanəsi Mixael Şumaxerin səhhətində müsbət dəyişikliklər müşahidə olunduğu bildirilir.
E-saglam.az-ın məlumatına görə, alman sürücünün artıq otura bildiyi və əlil arabasında hərəkət etdirilə bildiyi qeyd olunur.
2013-cü ilin dekabrında Fransanın Alp dağlarında Meribel kurortunda xizək sürərkən qayaya çırpılan Şumaxer ağır baş-beyin travması almış və aylarla tibbi komada saxlanılmışdı. Həmin vaxtdan etibarən onun müalicəsi həyat yoldaşı Korinna Şumaxer və peşəkar tibbi heyət tərəfindən xüsusi nəzarət altında davam etdirilir.
Qəzadan sonra Şumaxerin sağlamlıq durumu ailəsi tərəfindən ciddi şəkildə məxfi saxlanılıb. Bildirilir ki, 57 yaşlı keçmiş sürücü əsasən İsveçrə və İspaniyanın Mallorca adasındakı evləri arasında müalicəsini davam etdirir. Ailə şəxsi həyata hörmət məsələsinə xüsusi həssaslıqla yanaşır.
Britaniyanın Daily Mail nəşrinin məlumatına görə, Mixael Şumaxer artıq yataq xəstəsi sayılmır. O, yeriyə bilməsə də, otura bilir və tibbi personalın köməyi ilə əlil arabasında hərəkət etdirilir. Bu, onun səhhətində müəyyən funksional irəliləyişlərin olduğuna işarə kimi qiymətləndirilir.
Eyni zamanda, Şumaxerin “kilidli sindrom”dan əziyyət çəkmədiyi də bildirilir. Ailəyə yaxın mənbələrin sözlərinə görə, o, özünü tam ifadə edə bilməsə də, ətrafında baş verənlərin müəyyən hissəsini qavraya bilir.
Ailə hazırda əsasən Cenevrə gölü sahilində yerləşən Gland şəhərindəki malikanədə yaşayır. Bununla yanaşı, Korinna Şumaxerin 2017-ci ildə aldığı Mallorca adasındakı villada da müəyyən vaxt keçirirlər.
Şumaxerin məxfiliyinə verilən önəm 2025-ci ilin fevralında baş verən şantaj cəhdi ilə yenidən gündəmə gəlib. Üç nəfərin ailədən pul tələb edərək şəxsi foto, video və tibbi sənədləri yaymaqla hədələdiyi bildirilib.
Yeddiqat Formula 1 dünya çempionu olan Mixael Şumaxer, Luis Hamiltonla birlikdə bu idman növünün tarixində ən uğurlu pilotlardan biri hesab olunur. Ferrari-nin keçmiş texniki direktoru Ross Braun da qəzadan sonra onu görə bilən nadir insanlardan biri kimi göstərilir.
Tərcümə: Könül Oruc
