Yaz aylarında uşaqlarda asqırma, burun axması, quru öskürək kimi əlamətlər tez-tez allergiya ilə əlaqəli olur və bu, bəzən soyuqdəymə ilə səhv salına bilər.
E-saglam.az xəbər verir ki, uşaq sağlamlığı üzrə mütəxəssis Dr. Anıl Doğan bildirir ki, allergiyanı erkən tanımaq və düzgün yanaşmaq uşağın həyat keyfiyyətinə birbaşa təsir edir.
Əlamətlərə diqqət
Asqırma, gözlərdə sulanma, burun qaşınması, dad və iybilmə qabiliyyətinin azalması, baş ağrısı və davamlı öskürək allergiyanın əsas göstəriciləridir. Bu əlamətlər xüsusilə yaz aylarında iki-üç həftədən çox davam edirsə və qızdırma olmadan müşahidə olunursa, bu artıq allergik rinit ola bilər.
Müalicədə əsas addım
İlk növbədə, uşağın immun sistemi gücləndirilməlidir. Sağlam qidalanma, bol su içmək, istirahət və pediatr tərəfindən məsləhət görülən vitamin-mineral dəstəkləri vacibdir.
Əgər dərman müalicəsi kifayət etmirsə, vaksinlə (immunoterapiya) müalicə tətbiq oluna bilər. Bu üsul uşağın həssas olduğu allergenə qarşı bədəni daha dözümlü etməyə kömək edir.
Yaz allergiyasından qorunmaq üçün
Polen miqdarı yüksək olduqda uşaqları çölə buraxmayın, xüsusilə səhərlər. Evə gəldikdən sonra paltarlarını dəyişin. Paltarları yuduqdan sonra açıq havada qurutmayın, yataq dəstlərini tez-tez dəyişin və pəncərələri bağlı saxlayın.
Əgər yaz aylarında bu əlamətləri müşahidə edirsinizsə, mütləq mütəxəssisə müraciət edin.
Tərcümə: Könül Oruc
