Kardioloq Prof. Dr. Ərtoğrul Okuyan bildirir ki, infarktlar həmişə qəfil baş vermir – bədən əvvəlcədən bəzi xəbərdaredici siqnallar göndərə bilər.
E-saglam.az xəbər verir ki, sinə ağrısı, nəfəs darlığı, yorğunluq kimi əlamətlər infarktın yaxınlaşdığını göstərə bilər. Xüsusilə stress və fiziki yüklənmədən sonra qəfil inkişaf edən infarktlar daha ölümcül ola bilər.
Əsas səbəb ürək damarlarında tıxanmadır. Ateroskleroz nəticəsində yaranan lövhələr damarda laxta yaradaraq qan axınının dayanmasına səbəb olur. Əgər tıxanma əsas damarda baş verərsə, ölüm riski daha da artır.
Prof. Dr. Okuyan risk faktorları arasında genetik meyil, hipertoniya, şəkər, xolesterol, piylənmə və siqaret kimi dəyişdirilə bilən səbəblərə diqqət çəkir. Sağlam həyat tərzi bu riskləri azaltmaqda mühüm rol oynayır.
Ən vacib məqam isə ilk 5 dəqiqədə müdaxilədir. Ürək dayanması halında ürək masajı və defibrilasiya həyatı xilas edə bilər. Okuyan defibrilyator cihazlarının yayılmasının vacibliyini vurğulayaraq, vaxtında müdaxilə ilə həyatların xilas edilə biləcəyini qeyd edir.
Tərcümə: Könül Oruc
