Şərqi Avropa mətbəxinin məşhur şorbalarından olan Solyanka sağlamlıq baxımından ciddi risklər daşıya bilər.
E-saglam.az xəbər verir ki, ləzzətli olduğu qədər təhlükəli hesab edilən bu şorba, xüsusilə bəzi xəstəlikləri olan şəxslər üçün ciddi zərər törədə bilər.
Zərərli tərkib, cəlbedici dad
Solyanka əsasən Rusiya və Ukrayna kimi ölkələrdə geniş istifadə olunan, duzlu və turş dada malik, tərkibində kolbasa, salam, yağlı ətlər, turşu, zeytun, tomat pastası və limon olan dolğun bir şorbadır. Bu zəngin tərkib onu doyurucu və cazibədar etsə də, sağlamlıq baxımından mütəxəssislərin narahatlığına səbəb olur.
Mütəxəssislərdən ciddi xəbərdarlıq
Diyetoloqlar bildirir ki, Solyankanın yüksək yağ və duz tərkibi, xüsusilə hipertoniya, ürək-damar xəstəlikləri, qastrit, xora və pankreatit kimi problemləri olan şəxslər üçün təhlükəlidir. Emal olunmuş ət məhsulları qan təzyiqini artırır, mədə-bağırsaq sisteminə zərər verir və xroniki xəstəlikləri daha da dərinləşdirə bilər.
Ənənəvi ləzzət, müasir risklər
Bütün xəbərdarlıqlara baxmayaraq, Solyanka şorbası Şərqi Avropanın ənənəvi süfrələrində hələ də öz yerini qoruyur. Xüsusilə soyuq havalarda bədəni isidən və doyurucu təsiri ilə sevilən bu yemək, düzgün miqdarda və nadir hallarda istehlak edildikdə daha az risk daşıya bilər.
Sağlam alternativlərə üstünlük verin
Mütəxəssislər daha sağlam və balanslı pəhriz üçün az yağlı, az duzlu və liflə zəngin tərəvəz əsaslı şorbaları tövsiyə edirlər. Mərcimək, tərəvəz püresi və ya sümük suyu ilə hazırlanan yüngül reseptlər sağlamlıq baxımından daha uyğun seçimdir.
Tərcümə: Könül Oruc
