Pnevmoniya, yəni sətəlcəm sadə bir soyuqdəymə kimi başlayıb, ciddi tənəffüs yolu xəstəliyinə çevrilə bilər və müalicə edilmədikdə ölümə belə səbəb ola bilər.
E-saglam.az xəbər verir ki, bu xəstəlik, xüsusilə körpələr, yaşlılar və xroniki xəstəlikləri olan şəxslər üçün həyati təhlükə yaradır. Dünya miqyasında hər il milyonlarla insanı təsir altına alır.
Sətəlcəm adətən öksürək, baş ağrısı, halsızlıq, qızdırma, bəlğəm, sinə ağrıları və nəfəs darlığı kimi simptomlarla başlayır. Bu xəstəlik yaxın təmas yolu ilə, öksürək və asqıraqla, həmçinin eyni əşyaların istifadəsi ilə yayıla bilər. Siqaret çəkmək, zəif immuniteti olan insanlar, alkoqol istifadəsi və bəzi xroniki xəstəliklərə malik şəxslər sətəlcəmə daha çox meyllidir.
Pnevmoniya xəstəliyində erkən müalicə həyati əhəmiyyət daşıyır. Həkimlər xəstələrin simptomlarını qiymətləndirib lazımi testlər (ağciyər filmi, qan testi, bəlğəm testi və s.) istəyə bilərlər. Müayinə nəticəsində xəstəlik təsdiq edildikdən sonra dərhal müalicəyə başlanmalıdır, çünki vaxtında edilən müdaxilə xəstəliyin ağırlaşmasının qarşısını alır və ölüm riskini azaldır.
Əgər sətəlcəm bakterial infeksiya səbəbindən yaranıbsa, antibiotiklərlə müalicə edilir. Əksər hallarda, xəstələr evdə müalicə oluna bilər, amma bəzi hallarda xəstəxanaya yerləşdirmək lazım gəlir. Yaşlılar və ciddi xəstəlikləri olan şəxslər üçün bu xəstəlik daha təhlükəlidir. Əgər 72 saat ərzində antibiotiklə müalicə nəticə verməzsə, xəstə yenidən müayinədən keçirilməlidir.
Viral sətəlcəmdə antibiotiklər təsirli deyil. Bu halda xəstənin ümumi vəziyyətini yaxşılaşdırmaq üçün dəstək terapiyası tətbiq olunur. Bəzi hallarda isə xəstələr evdə müalicə oluna bilməz və xəstəxanada müalicə almaq lazımdır.
Nəticədə, sətəlcəm ciddi bir xəstəlikdir və vaxtında müalicə edilməzsə, ölümə səbəb ola bilər. Xüsusilə yaşlılar, xəstəlikləri olanlar və immuniteti zəif şəxslər üçün yüksək risklidir. Hər kəsin bu xəstəliyin simptomlarına diqqət etməsi və zamanında müalicə üçün həkimə müraciət etməsi olduqca vacibdir.
Tərcümə: Könül Oruc
