Məşhur rusiyalı onkoloq və immunoloq doktor Danil Şepelyaev xərçəngə tutulma riski yüksək olan insanların ümumi xüsusiyyətlərini açıqlayıb.
E-saglam.az xəbər verir ki, onun sözlərinə görə, bu xəstəliyə daha çox 50 yaşdan yuxarı olanlar, xroniki stress yaşayanlar və maddi sıxıntı ilə mübarizə aparanlar meyllidirlər.
Rusiyanın “Xəbərlər” portalına danışan həkim qeyd edib ki, müasir həyatın gətirdiyi davamlı stress və sağlamlığa laqeyd yanaşma xəstəliyin əsasını qoyan amillərdəndir.
“Həddindən artıq yorğun, borclu və özünə biganə”
Şepelyaevin sözlərinə görə, tipik onkoloji xəstə profili belədir: 50-dən yuxarı yaşda, yorğun, maddi sıxıntı içində, tez-tez borclu və sağlamlığına etinasız yanaşan insan. Belə şəxslər çox vaxt yalnız ən ucuz müalicə variantlarına yönəlirlər və nəticədə xəstəliyi vaxtında cilovlamaq imkanını itirirlər.
Stress və zəif immunitet
Onkoloq bildirib ki, əsas problem immun sistemindədir. “Xərçəng immunitet sistemi ilə sıx bağlı bir xəstəlikdir. Bədənin antitümör qorunma mexanizmi zəiflədikdə xəstəlik daha tez inkişaf edir. Kimsə 45 yaşında, kimsə isə 80 yaşında xərçənglə üzləşə bilər. Xroniki stress isə immuniteti zəiflədir və xəstəliyin yolunu açır”, – deyə Şepelyaev vurğulayıb.
Tərcümə: Könül Oruc
