İmmunitet sistemi orqanizmi virus, bakteri və digər zərərli amillərdən qoruyan əsas müdafiə mexanizmidir.
E-saglam.az xəbər verir ki, daxili xəstəliklər üzrə mütəxəssis Prof. Dr. Osman Erk qış mövsümünün yaxınlaşdığı günlərdə immunitetin niyə zəiflədiyini və bunun hansı əlamətlərlə özünü göstərdiyini açıqlayıb.
Mütəxəssisin sözlərinə görə, güclü immunitet orqanizmin infeksiyalara qarşı ilk müdafiə xəttidir. Zəif imun sistemində isə bədən xəstəliklərə daha açıq olur, iltihablanma və hüceyrə zədələnməsi riski artır.
Həkim bildirir ki, immunitetin zəiflədiyini göstərən əsas əlamətlər bunlardır: tez-tez xəstələnmək, davamlı yorğunluq, yaraların gec sağalması, ağız və boğaz narahatlıqları, yuxu pozuntuları. Bağırsaq problemləri də immun sisteminin zəif işlədiyinə işarə edir, çünki immun hüceyrələrinin böyük qismi bağırsaqlarda yerləşir.
Prof. Erk immuniteti zəiflədən ən yayğın səbəblərin düzgün qidalanmamaq, vitamin-mineral çatışmazlığı, bağırsaq pozuntuları, hematoloji problemlər, alkoqol və siqaret istifadəsi, tez-tez antibiotik qəbul etmək olduğunu bildirib. B12, fol turşusu və bəzi mineralların azlığı leykositlərin — yəni müdafiə hüceyrələrinin — fəaliyyətinə təsir edir və orqanizmi infeksiyalara qarşı daha həssas edir.
Mütəxəssis deyir ki, immuniteti güclü saxlamaq üçün meyvə-tərəvəzlə zəngin menyu, probiotik qidalar, kifayət qədər protein, tam taxıllar və sağlam yağlar rasionda mütləq olmalıdır. Gündəlik yuxu rejiminə əməl etmək, hərəkətli olmaq, stresi azaltmaq və lazım olduqda D, C vitamini, sink, selenyum kimi əlavələri həkim məsləhəti ilə qəbul etmək tövsiyə olunur.
Ekspert həmçinin qeyd edir ki, gigiyenaya diqqət etmək, havalandırması zəif məkanlarda uzun müddət qalmamaq və hava çirkliliyinin yüksək olduğu günlərdə maskadan istifadə immun sistemini qoruyan əsas addımlardandır.
Tərcümə: Könül Oruc
