Tüstü qısa müddətdə ciddi zəhərlənməyə səbəb ola bilər və doğru addımlar həyati əhəmiyyət daşıyır.
E-saglam.az xəbər verir ki, yanğın zamanı və ya bağlı məkanlarda tüstü yığılması nəfəs yollarını zədələyir, oksigenin azalmasına gətirib çıxarır. Adətən başgicəllənmə, nəfəs darlığı, halsızlıq, boğazda yanma kimi əlamətlər müşahidə olunur.
Əgər təhlükəli məkanlardan çıxmaq mümkündürsə, dərhal oradan uzaqlaşmaq lazımdır. Mümkün qədər yerə yaxın hərəkət etmək tövsiyə olunur, çünki aşağı qatlarda hava nisbətən daha təmiz olur. Açıq havaya çıxmaq və sakit nəfəs almaq ilkin kömək üçün vacibdir. Xəstənin vəziyyəti ağırdırsa, dərhal təcili yardım çağırılmalıdır.
Əgər binada yanğın baş verirsə və çıxmaq mümkün deyilsə, otağın qapısını bağlayın və altını nəmlənmiş parça ilə tutun. Bu, tüstünün otağa daxil olmasını ləngidir. Pəncərə varsa, siqnal vermək üçün əl yelləmək, parça və ya işıqla diqqət çəkmək tövsiyə olunur. Tüstü otağa daxil olmağa başlayanda yerə yaxın dayanmaq daha təhlükəsizdir. Liftdən istifadə qəti qadağandır, çünki bu əlavə təhlükə yarada bilər.
Mütəxəssislər həmçinin xəbərdarlıq edir ki, ev və iş yerlərində tüstü və karbonmonoksid detektorlarının quraşdırılması həyati təhlükəni əhəmiyyətli dərəcədə azaldır. Əsas məqsəd təhlükəsiz yerdə qalmaq və xilasetmə gələnə qədər özünü qorumaqdır.
Könül Oruc
