AI chatbotları gündəlik suallara cavab verə bilsə də, həkim məsləhətini heç vaxt əvəz edə bilməz.
E-saglam.az xəbər verir ki, süni intellektdən gələn tibbi məlumatlar çox ümumi, köhnəlmiş və ya yanıltıcı ola bilər.
Buna real bir nümunə də var: 60 yaşlı bir kişi ChatGPT-də gördüyü məsləhətə inanaraq süfrə duzunu natrium bromidlə əvəz edib və nəticədə bromid zəhərlənməsi ilə psixiatrik xəstəxanaya yerləşdirilib. Bu hadisə, AI-dən gələn tibbi məsləhətlərə kor-koranə inanmağın risklərini açıq şəkildə göstərir.
Problemin kökündə bir neçə amil dayanır. Əvvəla, chatbotların şəxsi tibbi tarixinizə və sağlamlıq qeydlərinizə çıxışı yoxdur, yəni simptomlarınızın təcili yardım tələb edib-etmədiyini qiymətləndirə bilməzlər. İkincisi, süni intellekt ən son tibbi təlimatları hər zaman əks etdirməyə bilər. Məsələn, Xəstəliklərə Nəzarət Mərkəzləri (CDC) qrip peyvəndi ilə bağlı tövsiyəsini yeniləsə də, bütün chatbotlar bu məlumatı dərhal əks etdirmir.
Digər təhlükə isə ondan ibarətdir ki, AI səhv olsa belə, cavablarını inandırıcı şəkildə təqdim edir. Bu isə istifadəçilərdə yanlış bir etibarlılıq hissi yaradır. Üstəlik, bu alətlər HIPAA kimi sağlamlıq məxfiliyi qanunları ilə qorunmadığından, şəxsi sağlamlıq məlumatlarınız hər yerdə yayıla bilər.
Mütəxəssislər bildirirlər ki, AI yalnız arxa plan məlumatı üçün faydalı ola bilər — məsələn, tibbi terminləri izah etmək və ya həkimə verəcəyiniz sualları hazırlamaq üçün. Amma yeni simptomlar, ciddi narahatlıqlar və müalicə ilə bağlı qərarlar üçün mütləq həkimə müraciət etmək lazımdır.
Tərcümə: Nəzrin Abbas
E-saglam.az
