Kardioloq Annapurna Kini yüksək qan təzyiqi olan şəxslərə qidalanmalarına çuğundur əlavə etməyi tövsiyə edib.
E-saglam.az xəbər verir ki, həkim bu tərəvəzin tərkibindəki nitratların qan damarlarına müsbət təsir göstərə biləcəyini bildirib.
Həkimin sözlərinə görə, yaş artdıqca qan damarları sərtləşə və damar divarlarında lövhələr yarana bilər. Bu dəyişikliklər qan təzyiqinin yüksəlməsi riskini artırır.
Çuğundurun tərkibindəki nitratlar orqanizmdə azot oksidinin yaranmasına kömək edir. Bu maddə qan damarlarının genişlənməsində rol oynayır və nəticədə qan dövranına, eləcə də qan təzyiqinin tənzimlənməsinə müsbət təsir göstərə bilər.
Kardioloq çuğundurun müxtəlif yeməklərə əlavə edilərək istehlak oluna biləcəyini qeyd edib. O, çuğundurun yarpaqlarının da faydalı maddələrlə zəngin olduğunu bildirib. Bu yarpaqları zeytun yağı və sarımsaqla hazırlamaq, salatlara və şorbalara əlavə etmək mümkündür.
Qeyd edək ki, çuğundur sağlam qidalanmanın bir hissəsi kimi qan təzyiqinin tənzimlənməsinə kömək edə bilər. Lakin o, yüksək təzyiqin müalicəsini əvəz etmir. Qan təzyiqi yüksək olan şəxslər həkimin təyin etdiyi dərmanları özbaşına dayandırmamalıdırlar.
