Boğazda nəsə ilişib qalmış kimi hiss etmək bir çox insanda narahatlıq yaradır. Halbuki, bəzi hallarda insan normal qidalana və rahat uda bilir.
E-saglam.az xəbər verir ki, tibb elmləri doktoru, professor və terapevt Svetlana Kanevskayanın sözlərinə görə, bu hissin yaranmasının müxtəlif səbəbləri var və əksər hallarda problem şişlə əlaqəli olmur.
Həkim bildirib ki, boğazda düyün hissi daha çox boğaz əzələlərinin gərginliyi, mədə turşusunun qida borusuna geri qayıtması (reflüks), burundan boğaza selik axması və narahatlıqla bağlı ola bilər. Bəzən bu səbəblər eyni vaxtda mövcud olur. Məsələn, reflüks və boyun əzələlərinin gərginliyi birlikdə bu hissi yarada bilər.
Tibbdə bu vəziyyət “qlobus hissi” adlanır. İnsan adətən boğazında yad cisim və ya təzyiq hiss edir. Bu narahatlıq xüsusilə tüpürcəyi udarkən daha çox hiss oluna, yemək yeyərkən isə azala və ya tamamilə yox ola bilər.
Həkim vurğulayıb ki, boğazda düyün hissi ilə udma çətinliyini fərqləndirmək vacibdir. Əgər insan yeməyi və suyu normal uda bilirsə, bu hiss çox vaxt ciddi problemlə əlaqəli olmur. Lakin qida həqiqətən boğazda ilişib qalırsa, udma zamanı ağrı və ya öskürək yaranırsa, yaxud udmaq getdikcə çətinləşirsə, həkim müayinəsi vacibdir.
Narahatlıq davam edərsə, ilk növbədə qulaq-burun-boğaz həkiminə müraciət etmək tövsiyə olunur. Müayinənin nəticəsinə əsasən əlavə yoxlamalar təyin edilə bilər. Reflüks şübhəsi olduqda həzm sistemi, qalxanabənzər vəzlə bağlı əlamətlər olduqda isə həmin vəzin fəaliyyəti qiymətləndirilə bilər.
Həkimin sözlərinə görə, müalicə problemin səbəbindən asılıdır. Reflüks, burun problemləri və ya əzələ gərginliyi müəyyən edildikdə uyğun müalicə seçilir. Boğazda düyün hissi uzun müddət davam edərsə və ya udma çətinliyi ilə müşayiət olunarsa, özbaşına müalicə aparmaq əvəzinə həkimə müraciət etmək lazımdır.
Könül Oruc
