İşləyən hər kəs ən azı bir dəfə istirahət gününün ilk saatlarında və ya bütün günü baş ağrısı, zəiflik və ya güclü yorğunluq hiss edib.
E-saglam.az xəbər verir ki, alimlər bunun səbəbini açıqlayıblar.
Gərgin iş rejimindən istirahət dövrünə keçərkən baş verən bu vəziyyət mütəxəssislər tərəfindən “asudə vaxt xəstəliyi” adlandırılır. Bu termini holland psixoloq Dr. Ad Vingerhoets 2002-ci ildə müəyyən edib; həftə sonları və uzun bayramlarda qəfil narahatlıq hissi ilə əlaqələndirilir.
Bədən daha həssas olur
Tətildən əvvəlki stress və yorğunluq immunitet sistemində dalğalanmalara səbəb olur. Stress zamanı ifraz olunan adrenalin və kortizol müvəqqəti qoruma təmin edir, lakin stress bitdikdən sonra immun müdafiə zəifləyir və insan viruslara və infeksiyalara daha həssas olur.
Həftə sonu miqren və xroniki stress
“Mütəxəssislər bildirirlər ki, həftə sonu miqren” kimi vəziyyət miqren xəstələrində də müşahidə edilə bilər. Stressli dövrün sona çatması hormon səviyyələrində ani dəyişikliklərə səbəb olur və miqren hücumlarını tətikləyə bilər. Xroniki stress immuniteti zəiflədir, lakin simptomlar yalnız insan rahatlayanda üzə çıxır.
Həyat tərzinin dəyişiklikləri də təsir edir
Tətildən əvvəl yuxu rejiminin pozulması, yeməklərin atlanması və qeyri-sağlam pəhriz immuniteti zəiflədir. Səyahət zamanı jet lag, susuzlaşma, yuxusuzluq və izdihamlı mühitlər yeni mikroblara məruz qalma riskini artırır.
Xəstəliklərin qarşısını almaq üçün məsləhətlər
-
Stressi azaldan kiçik texnikalar tətbiq edin (nəfəs məşqləri, rahatlama üsulları).
-
Bayramdan əvvəl yuxu, qidalanma və idmana diqqət yetirin.
-
Əlləri tez-tez yuyun və xəstə insanlardan uzaq durun.
-
Səyahət zamanı kifayət qədər maye qəbul edin.
-
Tətildə rutinizi tamamilə dəyişdirməyin; yuxu və pəhrizdə kəskin dəyişikliklərdən qaçının.
Tərcümə: Könül Oruc
