İnfeksion xəstəliklər üzrə mütəxəssis Vera Serejina bildirib ki, oktyabrın ortalarına doğru bədənin müdafiə qabiliyyəti zəifləyir və respirator virus infeksiyalarına yoluxma riski artır. Onun sözlərinə görə, mövsümə sağlam daxil olmaq üçün güclü immunitet vacibdir.
E-saglam.az xəbər verir ki, Serejina xüsusən D və C vitaminlərinin, həmçinin dəmir, sink, selen və misin orqanizm üçün önəmini vurğulayıb. O, ilk növbədə D vitamini səviyyəsini yoxlatmağı və çatışmazlıq olduqda həkim məsləhəti ilə qəbul etməyi tövsiyə edib. C vitamini üçün isə zoğal, itburnu, dəniz itburnu, duzlu kələm kimi məhsulları rasiona daxil etmək məsləhətdir.
Mütəxəssis həmçinin qeyd edib ki, payız və qış aylarında pəhrizə istiləşdirici təsiri olan ədviyyatlar, yağlı dəniz balığı, qurudulmuş meyvələr və təbii tərəvəz-meyvə çipsləri əlavə etmək faydalıdır.
Soyuq mövsümdə qorunmanın digər təsirli üsulu qrip peyvəndidir. Həkim vurğulayıb ki, peyvəndi sentyabr və ya oktyabrın əvvəlində, xüsusilə də insanlarla çox təmasda olanlar və immuniteti zəif şəxslər etdirməlidir. Bu, ağır xəstəliyin qarşısını alır və bədənin müdafiə sistemini gücləndirir.
Tərcümə: Könül Oruc
