Ümumi praktikant Aygül Arslanova qəfil ayağa qalxdıqda görmənin qaralmasının nədən qaynaqlandığını izah edib.
E-saglam.az xəbər verir ki, onun sözlərinə görə, bu hal adətən bir neçə saniyə davam edir, lakin bəzən sağlamlıq problemlərinin əlaməti ola bilər.
Mütəxəssis bildirib ki, bu vəziyyət çox vaxt ortostatik hipotoniyadan yaranır. Bu, bədən mövqeyi dəyişəndə qan təzyiqinin kəskin şəkildə aşağı düşməsi ilə xarakterizə olunur. Belə olduqda qan ayaqlara axır və beyin qısa müddət ərzində daha az oksigen alır. Nəticədə insanın gözləri qaralır və başgicəllənmə yarana bilər.
Həkimin sözlərinə görə, bu vəziyyətin əsas səbəbləri arasında susuzlaşma, bəzi dərmanların qəbulu, anemiya, diabet, ürək xəstəlikləri və ya çox sürətlə ayağa qalxmaq yer alır. Əksər hallarda problem zərərsiz olur və bir neçə saniyə ərzində keçib gedir.
Lakin bəzi hallarda mütləq həkimə müraciət etmək lazımdır. Bu hallar aşağıdakılardır:
şiddətli və uzun müddət davam edən başgicəllənmə;
ürəkbulanma, sürətli ürək döyüntüsü və ya sinə ağrısı;
epizodların tez-tez təkrarlanması;
huşunu itirmə.
Mütəxəssislər belə vəziyyətlərin tez-tez baş verməsi halında müayinədən keçməyi tövsiyə edirlər. Bu, mümkün ürək-damar və ya digər sağlamlıq problemlərini vaxtında aşkar etməyə kömək edə bilər.
Tərcümə: Könül Oruc
