Elmi araşdırmalar müəyyən günlərin insan sağlamlığına təsirini üzə çıxarır. Britaniya Ürək-Damar Cəmiyyəti Konfransında təqdim edilən bir araşdırma, ciddi infarktların bazar ertəsi günləri digər günlərə nisbətən 24% daha çox olduğunu müəyyən etdi.
E-saglam.az xəbər verir ki, 2013-2018-ci illər arasında İrlandiyada xəstəxanaya yerləşdirilən 10 000-dən çox xəstənin məlumatları araşdırılıb. Bu xəstələr əsas koronar arteriyanın tam tıxanması nəticəsində yaranan infarktın ən ciddi növü olan ST seqmentli miokard infarktı (STEMI) keçirmişlər. Nəticələr bazar ertəsi STEMI hallarında əhəmiyyətli artım göstərdi. Bundan əlavə, Amerika Ürək Dərnəyinin apardığı başqa bir araşdırma diqqət çəkir. Araşdırmaya görə, dekabrın son həftəsində infarktdan ölüm nisbətləri də digər dövrlərlə müqayisədə daha yüksəkdir.
Bazar ertəsi infarkt riskinin artmasının qəti bir səbəbi olmasa da, mütəxəssislər bəzi mümkün səbəbləri nəzərdən keçirirlər:
Stress və sirkadian ritm: Həftə sonundan sonra işə qayıtmaq və sıx iş qrafiki stress səviyyələrini artıra bilər. Eyni zamanda, bu vəziyyət bədənin bioloji saatına təsir edə bilər və hormon balansında dəyişikliklərə səbəb ola bilər.
Yuxu və həyat tərzi dəyişiklikləri: Həftə sonları gec yatmaq və spirtli içki qəbul etmək kimi vərdişlər, bazar ertəsi bədənin köhnə iş rejiminə qayıtmasını çətinləşdirə bilər.
Sıx iş tempi: Uzun iş saatları və həftənin əvvəlinin intensivliyi infarkt riskini tətikləyə bilər.
İnfarkt riskini azaltmaq üçün nə etmək olar?
Sağlam həyat tərzinə yiyələnmək və müəyyən ehtiyat tədbirləri görməklə infarkt riskini azaltmaq mümkündür: Meyvə, tərəvəz, tam taxıl və yağsız zülalları vurğulayan pəhriz planına əməl etməklə.
Velosiped sürmək, gəzmək, rəqs etmək və stolüstü tennis kimi aerobik fəaliyyətlərlə məşğul olmaq.
Meditasiya, yoqa və ya dərin nəfəs kimi üsullarla stressi azaltmaq.
Siqaret və spirt istehlakının məhdudlaşdırılması.
Müntəzəm sağlamlıq müəssisələrinə gedərək erkən diaqnoz və müalicə imkanı əldə etmək.
Tərcümə: Könül Oruc
