Gecə yuxudan durub tez-tez tualetə getmək bir çox insan üçün adi hal kimi görünür.
E-saglam.az xəbər verir ki, ancaq bu vəziyyət böyrəklərdən tutmuş ürək və şəkər xəstəliklərinə qədər müxtəlif səbəblərlə bağlı ola bilər. Əgər bu hal mütəmadi davam edirsə, diqqətli olun!
1. Şəkərli diabet
Bədənin qan şəkərini tənzimləyə bilməməsi nəticəsində sidiklə daha çox şəkər xaric olunur və bu, bədəndə maye itkisinə səbəb olur. Tez-tez sidiyə çıxma diabetin ilk və ən mühüm əlamətlərindən biridir.
2. Ürək çatışmazlığı
Ürək gecələr düzgün işləmədikdə bədəndə toplanan artıq mayeləri çıxarmaq üçün böyrəkləri daha çox işləməyə məcbur edir. Bu da insanın bir gecədə 2-3 dəfə tualetə getməsinə səbəb ola bilər.
3. Prostat problemləri (kişilər üçün)
Prostat vəzi böyüdükdə sidik kanalına təzyiq göstərir və bu da sidik ifrazını çətinləşdirir və tezləşdirir. Xüsusilə kişilər gecə yarısı birdən oyandıqlarını və tualetə çatmaqda çətinlik çəkdiklərini deyirlər.
4. Böyrək xəstəlikləri
Böyrəklər sidiyin tənzimlənməsində əsas rol oynayır. Onların funksiyası zəiflədikdə gecə sidiyə çıxma halları artır, bu isə bəzən xroniki böyrək xəstəliklərinin ilk əlaməti ola bilər.
5. İstifadə etdiyiniz dərmanlar
Xüsusilə təzyiq salan dərmanlar və ya sidikqovucular (diuretiklər) gecə sidiyə çıxma ehtiyacını artırır. Bu dərmanlar günün gec saatlarında qəbul olunursa, təsiri yuxuda özünü göstərə bilər.
Nə etmək olar?
Yatmazdan 2 saat əvvəl maye qəbulunu azaldın
Hər gecə eyni saatda yatmağa çalışın – yuxu ritmini qoruyun
Sidik yolları infeksiyası və ya şəkər üçün analiz etdirin
Kişilər prostat müayinəsindən keçsin
Daimi davam edərsə, həkimə müraciət edin – gecikdirməyin.
Tərcümə: Könül Oruc
