Diabet nəzarət altına alınmazsa, ürək xəstəlikləri, böyrək çatışmazlığı və sinir zədələnməsi kimi ciddi sağlamlıq problemlərinə səbəb ola bilər.
E-saglam.az xəbər verir ki, Endokrinoloq Dr. Ümit Çınkır diabet xəstələrinin müntəzəm müayinələri laqeyd etməmələrinin vacibliyini vurğulayır.
Dünyada milyonlarla insanın mübarizə apardığı diabet təkcə yüksək qan şəkəri ilə məhdudlaşmır, həm də müalicə olunmadıqda ağır fəsadlara yol aça bilər. Mütəxəssislər xəbərdarlıq edir ki, diabet insult və görmə itkisi kimi ölümcül nəticələrə səbəb ola bilər.
Dr. Çınkır diabetin göz sağlamlığına təsir edərək görmə itkisinə yol aça biləcəyini bildirir: “Diabetik retinopatiya diabetin ən çox rast gəlinən göz fəsadıdır. Yüksək qan şəkəri gözdəki kiçik damarları zəiflədir, tıxanmalara və qanaxmalara səbəb olur. Erkən mərhələdə hiss olunmasa da, gecə görmənin zəifləməsi və ümumi görmə qabiliyyətinin pisləşməsi müşahidə edilə bilər.”
Diabetin damarları sərtləşdirərək insult riskini artırdığına diqqət çəkən Çınkır əlavə edir: “Yüksək qan şəkəri, təzyiq və xolesterin birlikdə beynə qan axınının azalmasına səbəb olur. Nəticədə, diabet xəstələrinin insult keçirmə ehtimalı sağlam insanlara nisbətən üç dəfə yüksəkdir”.
Bu ağırlaşmaların qarşısını almağın ən təsirli yolu erkən diaqnozdur. Diabet riski olan şəxslər illik tibbi müayinələri laqeyd etməməli və xəstəliyin ilk əlamətləri görünən kimi həkimə müraciət etməlidirlər.
Çınkır vurğulayır ki, erkən müalicə diabetin ağırlaşmalarının qarşısını almaqda əsas rol oynayır. Sağlam həyat tərzi, müntəzəm fiziki fəaliyyət, düzgün qidalanma, siqaret və alkoqoldan imtina qan şəkərinin idarə edilməsinə kömək edir. Artıq çəkidən qurtulmaq da diabetin inkişafını yavaşlada bilər.
Diabetin nəzarətsiz qalması təkcə qan şəkərinin artması ilə bitmir – bu, bütün orqanizmi təhlükə altına qoyur. Buna görə də diabet xəstələri müntəzəm müayinələrdən keçməli, sağlam həyat tərzini mənimsəməli və həkim tövsiyələrinə ciddi əməl etməlidirlər.
Tərcümə: Könül Oruc
