Dünyada 425 milyon diabet xəstəsi var və onların 75 milyonu hər gün insulin iynəsi vurmaq məcburiyyətindədir. Alimlər yeni bir metod taparaq insulinin ağız vasitəsilə qəbulunu mümkün ediblər. Bu üsul sayəsində insulin kapsul və ya şokolad içərisində qəbul edilə bilər.
E-saglam.az xəbər verir ki, insulin nano daşıyıcılarda saxlanılır və bədənə çatdırılarkən parçalanmadan qalır. Sidney Universitetinin alimləri bu texnologiyanı inkişaf etdirərək insulinin yalnız qaraciyərdə aktiv olmasını təmin edən xüsusi örtük hazırlayıblar.
Bu üsul, insulin iynələrindən fərqli olaraq, bədənin ehtiyac duyduğu bölgələrə insulin göndərir və yan təsirləri azaldır. Şpris vasitəsilə insulin qəbul edildikdə isə o, bütün bədənə yayılaraq yağ yığılmasına və hipoqlikemiyaya səbəb ola bilər.
Yeni metodla klinik sınaqlar 2025-ci ildə başlayacaq. Əgər müsbət nəticələr əldə olunarsa, bu dərmanın 2-3 il ərzində istifadəyə verilməsi planlaşdırılır. Bu isə diabet xəstələri üçün iynəsiz bir gələcək vəd edir.
Tərcümə: Könül Oruc
