ABŞ-də aparılan yeni araşdırma göstərib ki, pəhrizdə izolösin adlı vacib amin turşusunun azaldılması siçanların ömrünü və sağlamlığını əhəmiyyətli dərəcədə yaxşılaşdırır.
E-saglam.az xəbər verir ki, İzolösin zülal sintezi üçün vacibdir və yumurta, süd məhsulları, soya və ət kimi qidalardan alınır. Lakin həddindən artıq qəbulu metabolik problemlərlə, o cümlədən artıq çəki ilə əlaqələndirilir.
Araşdırmada müxtəlif siçan qrupları ya normal qidalanma, ya bütün amin turşularının azaldıldığı pəhriz, ya da yalnız izolösinin azaldıldığı pəhrizlə qidalandırıldı. Nəticələr göstərdi ki, izolösin məhdudiyyəti siçanlarda daha arıq bədən çəkisi, yaxşı qlükoza nəzarəti, daha güclü əzələlər və daha az xərçəng riski ilə yanaşı ömrün də uzanmasına səbəb olur. Erkək siçanlarda ömür 33%, dişilərdə isə 7% artıb.
Maraqlısı odur ki, siçanlar daha çox kalori qəbul etsələr də, kökəlməyib əksinə, daha çox enerji sərf ediblər.
Alimlər hesab edirlər ki, izolösin qəbulu insanlarda da oxşar uzunömürlülük təsiri göstərə bilər. Lakin bunu praktik olaraq həyata keçirmək çətindir, çünki protein məhdudiyyəti sağlamlıq üçün risklidir və insan pəhrizi siçanlardakı qədər nəzarət edilə bilməz.
Mütəxəssislər düşünürlər ki, gələcəkdə izolösini hədəf alan dərman və ya xüsusi qidalanma yanaşmaları qocalmanı ləngitmək üçün yeni imkanlar aça bilər.
Araşdırma Cell Metabolism jurnalında dərc olunub.
Tərcümə: Könül Oruc
