Səhər yeməyi günün ən vacib yeməyi hesab edilir və enerji səviyyəmizi müəyyən edir. Buna görə səhər yeməyində sağlam seçimlər etmək çox önəmlidir. Lakin bəzi qidalar, xüsusilə işlənmiş ətlər, uzun müddətdə beyin sağlamlığına zərər verə bilər.
E-saglam.az xəbər verir ki, tədqiqatlar göstərir ki, səhər yeməyində müntəzəm olaraq kolbasa, donuz əti kimi işlənmiş ətlərin istehlakı demans riskini artıra bilər. Harvard Universitetində aparılan bir araşdırmada, gündə iki dilim donuz əti və ya bir kolbasa istehlak edən şəxslərin demans riskinin 13% daha çox olduğu müəyyən edilib.
İşlənmiş ətlərdəki nitritlər və doymuş yağ turşuları beyin sağlamlığına mənfi təsir göstərə bilər. Bu maddələr oksidləşdirici stressi artırır, iltihab yaradır və lipidlərin zədələnməsinə səbəb olur. Həmçinin, duzla zəngin olan bu qidalar yüksək qan təzyiqi riskini artıraraq sağlamlığa əlavə təhlükə yaradır.
Tədqiqatçılar işlənmiş ətlərin balıqla əvəz edilməsini tövsiyə edir. Balıq istehlakı demans riskini 28% azalda bilər. Həmçinin, toyuq kimi quş ətinin seçilməsi riski 19% azaldır.
Bundan əlavə, bitki mənşəli qidalar da beyin sağlamlığı üçün faydalıdır. Qoz-fındıq, paxlalılar, mərcimək və lobya kimi məhsullar demans riskini 19% azalda bilər.
Beyin sağlamlığını qorumaq üçün səhər yeməyində işlənmiş ətlərdən çəkinmək və daha sağlam alternativlər seçmək vacibdir. Balıq, toyuq və bitki mənşəli qidalar həm bədən, həm də beyin sağlamlığını dəstəkləmək üçün ideal seçimlərdir. Həyat keyfiyyətinizi artırmaq üçün qidalanma vərdişlərinizə diqqət yetirin və balanslı seçimlər edin.
Sağlam səhər yeməyi nümunəsi:
1 qaynadılmış yumurta
1 dilim tam buğda çörəyi
1 dilim ağ pendir və ya 2 xörək qaşığı kəsmik
5-6 zeytun
Pomidor, xiyar, göyərti
1 ovuc qoz və ya badam
Yanında bir stəkan şəkərsiz bitki çayı
Tərcümə: Könül Oruc
