Baş ağrıları demək olar ki, hər kəsin zaman-zaman yaşadığı bir narahatlıqdır. Ancaq bəzən bu ağrılar bədəndəki maqnezium çatışmazlığından qaynaqlana bilər. Maqnezium bədənin düzgün işləməsi üçün vacib bir mineraldır və onun çatışmazlığı baş ağrısı, əzələ krampları və digər sağlamlıq problemlərinə səbəb ola bilər.
E-saglam.az xəbər verir ki, maqnezium orqanizmdə mühüm funksiyalar yerinə yetirən bir mineraldır. Hüceyrələrin metabolik prosesləri üçün lazımdır. Çox vaxt qan testlərində maqnezium səviyyəsi normal görünsə də, əslində bədəndə çatışmazlıq ola bilər. Bu vəziyyəti müəyyən etmək üçün daha spesifik testlər tələb oluna bilər.
Maqnezium çatışmazlığının ən çox rast gəlinən əlamətlərindən biri baş ağrılarıdır. Xüsusilə migren xəstələri üçün maqnezium əlavələri ağrıları azaltmağa kömək edə bilər. Bundan əlavə, əzələ ağrıları və kramplar da maqneziumun kifayət qədər olmamasına işarə edə bilər.
Bu mineralın çatışmazlığı təkcə baş ağrısına deyil, həm də qəbizlik, insulin müqaviməti və sümük sağlamlığı problemlərinə səbəb ola bilər. Maqnezium D və K vitaminləri ilə birlikdə qəbul edildikdə, sümüklərin sağlamlığını qorumağa kömək edir.
Qadınlarda maqnezium çatışmazlığı menstrual ağrıların daha şiddətli olmasına səbəb ola bilər. Bu hallarda maqnezium əlavələri ağrıları azaltmaq üçün faydalı ola bilər. Xüsusilə menstruasiya dövründə tez-tez ağrılar yaşayan qadınlara maqnezium tərkibli preparatlar tövsiyə olunur.
Əgər davamlı baş ağrılarınız və ya əzələ kramplarınız varsa, maqnezium səviyyənizi yoxlatmaq üçün həkimə müraciət etməyiniz vacibdir. Lazım gələrsə, həkim məsləhəti ilə maqnezium əlavələri qəbul edərək bu problemləri azaltmaq və həyat keyfiyyətinizi yaxşılaşdırmaq mümkündür.
Tərcümə: Könül Oruc
