Alimlər bağırsaq sisteminin yalnız həzm üçün yox, qərarvermədə və emosional vəziyyətimizdə də mühüm rol oynadığını sübut edən yeni araşdırma yayımlayıblar.
E-saglam.az xəbər verir ki, ABŞ-nin Corctaun Universitetində aparılan araşdırmaya görə, bağırsaqlarda yerləşən sinir hüceyrələrinin sayı beyindəki bəzi hissələrə bərabərdir və bu sistem özlüyündə müstəqil şəkildə işləyə bilir.
Mütəxəssislər bildirirlər ki, bağırsaq sistemində yerləşən enterik sinir sistemi bədənin ikinci beyni kimi fəaliyyət göstərir. Bu sistem yalnız qida emalını idarə etmir, eyni zamanda stress, əhval və hətta qərarvermə davranışlarına da təsir edir. Tədqiqatçılar bağırsaq mikroflorasında baş verən dəyişikliklərin depressiya, narahatlıq və yaddaş problemləri ilə birbaşa əlaqəli olduğunu aşkar ediblər.
Alimlər qeyd edir ki, bəzi hallarda bağırsaqdan gələn siqnallar beynə gedən siqnallardan daha sürətli və güclü olur. Bu da “qarın hissi” deyilən instinktiv qərarların elmi əsasını ortaya qoyur.
Araşdırma bağırsaq mikroflorasının balansını qorumağın təkcə fiziki sağlamlıq üçün deyil, eyni zamanda zehni rifah üçün də vacib olduğunu bir daha təsdiqləyir. Probiotiklərlə zəngin qidalar, təbii lif mənbələri və stressin azaldılması bu sistemin optimal işləməsi üçün əsas addımlar sayılır.
Tərcümə: Könül Oruc
